काठमाडौं । नेपाली पुरुष क्रिकेट टोलीले विश्वकपका लागि ऐतिहासिक रुपमा छनोट भएपछि देशमा पुरस्कार र आर्थिक सहयोगको अभूतपूर्व लहर आएको छ। सरकारी, राष्ट्रिय र कर्पोरेट क्षेत्रबाट भएको यो ठूलो आर्थिक सहयोगले नेपाली क्रिकेटको बढ्दो व्यावसायिक गतिलाई पुष्टि गर्छ।
टोलीको ऐतिहासिक सफलतालाई कदर गर्दै नेपाल सरकारले राष्ट्रिय टोलीका सदस्य र प्रशिक्षकहरुका लागि कुल २ करोड ४ लाख ७० हजार रुपैयाँ वितरण गर्ने घोषणा गरेको छ। यसअन्तर्गत प्रत्येक खेलाडीले नगद पुरस्कारस्वरुप १३ लाख रुपैयाँ प्राप्त गर्नेछन्।
यसका साथै राष्ट्रिय खेलकुद परिषद् (राखेप) ले पनि प्रत्येक खेलाडीलाई थप १९ लाख ५ हजार रुपैयाँ प्रदान गर्ने पुष्टि गरेको छ। क्रिकेटको नियमनकारी निकाय नेपाल क्रिकेट संघ क्यानले पनि टिमलाई विश्वकप छनोटको सम्मानस्वरुप ५० लाख रुपैयाँ नगद पुरस्कार घोषणा गरेको छ।
नेपाली टोलीको विजयपछि निजी क्षेत्रबाट ठूलो पुरस्कार राशि घोषणा गरिएको छ। जसले कर्पोरेट साझेदारीको नयाँ उदाहरण स्थापित गरेको छ।
यती ब्रुअरीले छनोट भएबापत खेलाडीहरु र क्यान लाई आधा–आधा गरी कुल १ करोड २ लाख रुपैयाँ पुरस्कार दिने घोषणा गरेको छ। अर्ना बियरले पनि टोलीलाई १ करोड रुपैयाँ दिने प्रतिबद्धता जनाएको थियो।
वाईवाई (सीजी) ले प्रदर्शनमा आधारित आकर्षक प्रोत्साहनको व्यवस्था गरेको छ। जसमा प्रतिरन १ हजार रुपैयाँ, प्रत्येक चौकाका लागि ८ हजार रुपैयाँ, छक्काका लागि १२ हजार रुपैयाँ, विकेटका लागि १५ हजार रुपैयाँ र प्रत्येक जितका लागि १ लाख ५० हजाररुपैयाँ समावेश छन्। यसका साथै, वाईवाईले टोली सुपर ८ चरणमा पुगे ३० लाख रुपैयाँ प्रदान गर्ने घोषणा गरेको छ।
यसबाहेक क्यानले सिंगापुरको सिंगा स्टिल प्रालिसँग किट र गियरसहित ३ वर्षका लागि करिब ३ करोड रुपैयाँको प्रायोजन सम्झौतामा हस्ताक्षर गरेको छ।
घरेलु क्रिकेटको व्यावसायिकता पनि तीव्र गतिमा बढिरहेको छ। नेपाल प्रिमियर लिगको पहिलो सिजनको वित्तीय प्रदर्शन निकै उत्साहजनक रह्यो।
एनपीएलको कुल आम्दानी २७ करोड ६९ लाख रुपैयाँभन्दा बढी रह्यो। जसमा ७ करोड ५३ लाख रुपैयाँभन्दा बढी खुद नाफा भएको थियो।
सिद्धार्थ बैंकले एनपीएलको टाइटल प्रायोजकका रुपमा २० करोड रुपैयाँ लगानी गरेको छ। एनपीएलको विजेता टिमले १ करोड १० लाख रुपैयाँ, उपविजेताले ५१ लाख रुपैयाँ र तेस्रो स्थान प्राप्त गर्ने टिमले २५ लाख रुपैयाँ प्राप्त गर्नेछन्।
क्यानले सन् २०२५ का लागि ६१ करोड ७० लाख रुपैयाँ आम्दानीको अपेक्षा राखेको छ। जसले संघको बढ्दो बजेट र महत्वाकांक्षी योजनाहरुलाई प्रतिविम्बित गर्दछ।
पुरुष क्रिकेट टोलीको विश्वकप छनोटले सरकार, कर्पोरेट कम्पनी र अन्तर्राष्ट्रिय प्रायोजकहरुबाट अभूतपूर्व आर्थिक सहयोग जुटाएको छ। एनपीएलको नाफा र क्यानको बढ्दो बजेटले घरेलु क्रिकेटको आर्थिक स्थिति मजबुत भएको देखाउँछ। यो ठूलो वित्तीय लगानीले नेपालमा ग्रासरुट क्रिकेट र प्रतिभा विकासलाई थप प्रोत्साहन गर्ने निश्चित छ।
