काठमाडौं । एशियाली विकास बैंक(एडिबि) ले नेपालको अर्थतन्त्र आर्थिक वर्ष २०२४ मा ४.३ प्रतिशत (बजार मूल्यमा) वृद्धि हुने अनुमान गरेको छ । गत आर्थिक वर्षमा नेपालकाे आर्थिक वृद्धि १.९ प्रतिशतले मात्र भएकाे एडिबिले प्रकाश गर्ने एशियन डेभलपमेन्ट आउटलुक (एडीओ) काे सेप्टेम्बर २०२३ को पछिल्लो संस्करणमा उल्लेख छ।
मुद्रास्फीतिमा न्यूनता र सहज विदेशी विनिमय सञ्चितिसँगै केन्द्रीय बैंक नेपाल राष्ट्र बैंकले आफ्नो मौद्रिक नीति अडानलाई ५० आधार बिन्दुले घटाएर ६ दशमलव ५ प्रतिशतमा पुर्याएकाले ब्याज दर घटाउन र आर्थिक गतिविधिलाई प्रोत्साहन गर्न सहयाेग गर्ने अपेक्षा एडिबीकाे छ। घर जग्गा काराेबार, थोक र खुद्रा व्यापार र आवास र खाद्य सेवाबाट आउने विस्तारसँगै सेवा क्षेत्रले राम्रो प्रदर्शन गर्ने अपेक्षा गरिएको छ। जुन महिनामा भएकाे न्यून वर्षा र मौसमको अनियमितताले कृषी उत्पादमा गिरावट र गाईवस्तुमा छालाको प्रकोपले कृषी क्षेत्रकाे उत्पादकत्व घटाउने अनुमान गरिएकाे छ।
प्रतिवेदनले अन्तर्राष्ट्रिय बजारमा पेट्राेलियम इन्धनकाे मूल्यमा आएको कमी र नेपालको आयातको मुख्य स्रोत भारतमा मुद्रास्फीतिमा आएको गिरावटका कारण आर्थिक वर्ष २०२३ मा ७.७ प्रतिशतबाट वार्षिक औसत मुद्रास्फीति आर्थिक वर्ष २०२४ मा ६.२ प्रतिशतमा झर्ने प्रक्षेपण समेत गरेको छ।
“मूल्य र बाह्य क्षेत्रको स्थायीत्व पुनर्स्थापनामा केही प्रगति भए पनि वित्तीय चुनौतीहरू यथावत रहेकाे अध्ययन प्रतिवेदनमा उल्लेख छ।आर्थिक वर्षको अनुमानित वित्तीय घाटा कूल गार्हस्थ उत्पादनकाे २.४ प्रतिशतमा सीमित हुने अनुमान छ । गत वर्ष यस्ताे घाटा ६.१ प्रतिशत रहेकाे थियाे । सरकारले चालू आर्थिक वर्षका लागि आफ्नो महत्वाकांक्षी राजश्व लक्ष्य पूरा गर्न नसके वास्तविक घाटा धेरै बढी हुन सक्ने चेतावनी समेत एडिबीले दिएकाे छ।
पछिल्लो समयको प्रवृत्ति र केन्द्रीय बैंकको विवेकपूर्ण मौद्रिक नीतिलाई हेर्दा कम्तीमा ७ महिनाको आयात धान्न पर्याप्त विदेशी विनिमय सञ्चिति कायम गर्ने लक्ष्य हासिल हुने देखिन्छ । स्थिर रेमिट्यान्स र उच्च आयातको बीचमा, चालू खाता घाटा कूल गार्हस्थ उत्पादनकाे १.८ प्रतिशतमा सीमित हुने अपेक्षा गरिएको छ।
