काठमाडौं । पटके रुपमा लगानी गरेका लगानीकर्ताको पूँजीगत लाभकरमा कुनै फेरबदल नभएको आन्तरिक राजश्व विभागले प्रष्ट पारेको छ । नियमित व्यवसायको रुपमा नभई पटके रुपमा लगानी गरेका धितोपत्र विक्री गर्दा हुने लाभमा साविक बमोजिमकै कानुनी व्यवस्था रहेको विभागले जनाएको छ ।
यस्तो कारोबारबाट भएको लाभमा नियमानुसार दाखिला भएको ५ प्रतिशत वा ७.५ प्रतिशत पूँजीगत लाभकर अन्तिम हुने कानुनी व्यवस्थामा कुनै परिवर्तन नभएको व्यवस्था सम्बन्धी लगानीकर्ता एवं सर्वसाधारणको जानकारी लागि सूचना नै जारी गरिएको छ ।
आर्थिक विधेयक २०८० को दफा २९ बमोजिम धितोपत्र नियमित व्यवासायिक कारोबार गर्ने प्रकृतिक व्यक्तिलाई प्रदान गरिएको छुट सुविधाका सम्बन्धमा शेयर बजारमा लगानी गर्ने लगानीकर्तामा अन्योलता बढ्दै आएको थियो । यस विषयलाई लिएर हिजो नेपाल इन्भेष्टर्स फोरम, शेयर लगानीकर्ता संघ र नेपाल पूँजीबर लगानीकर्ता संघले संयुक्त प्रेश विज्ञप्ती जारी गर्दै यस व्यवस्थालाई हटाउन अनुरोध गरेका थिए । यदि यो व्यवस्था रहिरहेमा आन्दोलनको चेतावनी समेत दिएका थिए ।
आन्तरिक राजश्व विभाले जारी गरेको सूचनामा नियमित व्यवसाय र पटके व्यवसायका रुपमा लगानीकर्तालाई वर्गिकरण गर्न खोजिएको देखिन्छ । तर कस्तो लगानीकर्तालाई नियमित भन्ने र कस्तो लगानीकर्तालाई पटके लगानीकर्ता भन्ने अन्योलता कायमै छ ।
सूचनामा भनिए अनुसार आम सर्वसाधारण जसले व्यक्तिगत रुपमा कहिले काहि शेयर कारोबार गर्छन् उनिहरुलाई ५ प्रतिशत र ७.५ प्रतिशत अन्तिम कर रहेको विषयलाई भने प्रष्ट पारिएको छ । विभागले भने अनुसार जसले शेयर बजारलाई नै आधार मानेर नियमित कारोबार गर्दै आएका छन् उनिहरुले भने मुनाफामा थप ३० प्रतिशत कर तिर्नु पर्ने देखिएको छ । यसै व्यवस्था बमोजिम सरकारले गएका तीन आर्थिक वर्षमा सम्बन्धित लगानीकर्तालाई आफुले यस व्यवस्था अनुसार भुक्तानी गर्नु पर्ने करको ५० प्रतिशत भुक्तानी गर्न निर्देशन दिइएको छ । तर यस विषयमा लगानीकर्ताहरु प्रष्ट हुने सकेका छैनन् ।
