काठमाडौं । वाग्मती प्रदेश सरकारबाट बाहिरिने निर्णयसँगै नेकपा एमालेका मन्त्रीहरुले राजीनामा बुझाएका छन् । प्रदेश सभालाई सम्बोधन गर्दै नेकपा एमाले संसदीय दलका नेता एवं आर्थिक मामिला तथा योजना मन्त्री जगन्नाथ थपलियाले मुख्यमन्त्री शालिकराम जमकट्टेललाई राजीनामा बुझाएका हुन् ।
प्रदेश सरकारमा एमालेबाट जगन्नाथ थपलिया आर्थिक मामिला तथा योजना मन्त्री, एकालाल श्रेष्ठ श्रम रोजगार तथा यातायात, स्वास्थ्यमन्त्रीमा रामेश्वर श्रेष्ठ र कृषि तथा पशुपन्छी विकास मन्त्रीमा केशवप्रसाद पोखरेल रहेका छन् । राजीनामा बुझाएसँगै एमाले प्रतिपक्षमा बस्ने र मुख्यमन्त्रीलाई विश्वासको मत नदिने नेता थपलियाले बताए ।
यसैगरी, नेकपा माओवादी केन्द्रले गण्डकी प्रदेश सरकारबाट बाहिरिने निर्णय गरेको छ । गण्डकीमा नेकपा माओवादीका नेता हरिबहादुर चुमानले भौतिक पूर्वाधार मन्त्रीको जिम्मेवारी पाएका थिए भने पर्यटन वन तथा वातावरण मन्त्रीमा रेशमबहादुर जुग्जाली रहेका थिए । माओवादी संसदीय दलको बैठकले सरकारबाट समर्थन फिर्ता लिने निर्णय गरेसँगै मन्त्रीहरुले राजीनामा दिने तयारी गरेका हुन् ।
गण्डकी प्रदेशमा माओवादीले सरकारबाट समर्थन फिर्ता लिएपछि एक महिनाभित्र मुख्यमन्त्री खगराज अधिकारीले विश्वासको मत लिनुपर्नेछ ।
