काठमाडौं । स्वास्थ्य बीमा वापत सर्वसाधारणसँग उठाइएको बीमा शुल्क रकम लिएर स्वास्थ्य बीमा बोर्डका एक कर्मचारी फरार भएका छन् । स्वास्थ्य बीमा वापत संकलन गरिएको करिब २२ लाख रुपैयाँ लिएर बोर्डका सि.अ.हे.व छैठौं तहका मोहम्मद फिरोज अली फरार भएको बोर्डले एक सुचना जारी गर्दै जनाएको छ ।
पुस ११ गतेदेखि फरार भएका अलिलाई स्वास्थ्य बीमा बोर्डले २४ घण्टाभित्र हाजिर भई स्पष्टीकरण पेश गर्न पत्राचार गरेपनि उनले कुनै पनि प्रतिक्रिया नजनाएको बोर्डले उल्लेख गरेको छ ।
बोर्डको उदयपुर जिल्ला सम्पर्क कार्यालयमा कार्यरत अली पुस ११ गते देखि कुनै सुचना तथा जानकारी बिना कार्यायलमा अनुपस्थित भएको र पटक पटक सम्पर्क गर्दा समेत सम्पर्कबिहिन भइ कुनै पनि जिम्मेवार बोध नगरेको बार्डबाट कल गर्दा फोन नउठाएको र कुनै पनि रेसपोन्स नगरेको बोर्डले जनाएको छ ।
अलीले २०६९ असार मसान्तभित्रमा दर्ता सहयोगीहरु मार्फत बीमितबाट संकलन गरेको २१ लाख ८५ हजार १५० रुपैयाँ बीमा शुल्क आफ्नो व्यक्तिगत खातामा जम्मा गरेको र व्यक्तिगत चेकबाट बोर्डको खातामा जम्मा गर्न भौचर भरी पेश गर्दा त्यसबेला खातामा रकम नभई चेक फिर्ता (बाउन्स) भएको थियो । त्यसको सम्बन्धमा बोर्डले पुस १३ गते पत्रचार गरी स्पष्टिकरण माग गरेकोमा आजसम्म कुनै जानकारी नआएको बोर्डले जनाएको छ ।
बोर्डले अलीलाइ सुचना प्रकाशित भएको मितिले सात दिनभित्र रकम दाखिल गरेर स्पष्टीकरण पेश गर्न आग्रह गरेको छ । बोर्डले तोकिएको यस समयभित्र अलीले रकम दाखिल गरेर स्पष्टीकरण पेश नगरेमा अपचलन गरेको रकम व्याज सहित असुल गर्न प्रक्रिया अघि बढाउने र कानून बमोजिम कारबाही गर्ने बोर्डले जनाएको छ ।
