काठमाडौं । राजनीतिक अन्योलता सँगै शेयर बजार लगातार घटिरहेको छ । राष्ट्रिय स्वतन्त्र पार्टीका अध्यक्ष रवि लामिछानेलाई सर्वोच्चले अनागरिक भन्दै सांसद तथा मन्त्रिपद नै खोसिदिए पछि राजनीतिक अन्योलता थप चुलिदै गएको छ । उनले सर्वोच्चको आदेश पछि जिल्ला प्रशासनबाट नागरिकता लिइसकेका छन् । यस सँगै उनले प्रधानमन्त्री पुष्प कमल दाहाल प्रचण्ड सँग पुनः गृहमन्त्रीमा दावा गरे पछि राजनीतिक असमझदी बढेको हो ।
अध्यक्ष लामिछानेले यदि आफ्नो पार्टीलाई गृहमन्त्री नदिएमा सरकारबाट हट्ने चेतावनी दिइसकेका छन् । यदि राष्ट्रिय स्वतन्त्र पार्टीले सरकार छाड्यो भने सत्ता समिकरण पुनः परिवर्तन हुनेछ । यस्तो अवस्थामा मन्त्रिमण्डल नै परिवर्तन हुन्छ । यहि गतिरोधले गर्दा लगानीकर्ताको मनोविज्ञान कमजोर बनेको छ ।
सरकार संरचना परिवर्तन भयो भने नेकपा ऐमालेको तर्फबाट अर्थमन्त्री बनेका विष्णु प्रसाद पौडेलको मन्त्रिपद पनि धरापमा पर्नेछ । शेयर बजारको पछिल्लो सुधारको प्रमुख कारण अर्थमन्त्री पौडेल नै हुन् । उनि अर्थमन्त्री बन्ने चर्चा सँगै सुधार हुन थालेको शेयर बजार उनि अर्थमन्त्री भए पछि साढे तीन सय अंकले सुधार भयो ।
तर सत्ता समिकरणमा विवाद निस्किए पछि सरकार परिवर्तन हुने चर्चाले शेयर बजार पनि तल झर्न थालेको हो । यहि क्रममा दोस्रो बजार १२० अंक भन्दा धेरैले घटेको छ । अहिलेको राजनीतिक समिकरण पछि नेप्से सूचक २२११ अंकसम्म पुग्यो ।
बिहीबार नेप्से सूचक २२.१२ अंकले घटेर २०९४.५४ अंकमा झरेको छ । सूचक सँगै कारोबार रकम पनि २ अर्ब ९ करोडमा सिमित भएको छ । आज सम्पुर्ण सूचक तथा उपसूचकमा गिरावट आएको छ । १९४ वटा कम्पनीको शेयर मूल्यमा गिरावट हुँद जम्मा १९ कम्पनीको शेयर मूल्यमा सुधार देखिन्छ ।
आज पनि सर्वाधिक सुधार हुने क्रममा आदर्श लघुवित्त वित्तीय संस्थाको शेयर मूल्यमा सकारात्मक सर्किट लागेको छ । सबैभन्दा धेरै स्ट्याण्डर्ड चार्टर्ड बैंकको १० करोडको कारोबार भएको छ ।
