काठमाडौं । नेपाल बीमा प्राधिकरणले विद्युतीय भुक्तानी सेवा प्रदायक थप्ने भएको छ । हाल एनसिएचएलको कनेक्ट आइपिएस मार्फत मात्रै भुक्तानी हुँदै आएकोमा अव प्राधिकरणले यस्ता सेवा प्रदायकको संख्या थप्ने भएको हो ।
प्राधिकरणले आफ्ना सेवालाई प्रविधिमैधी बनाउँदै लैजानेक्रममा प्राधिकरणलाई बुझाउनु पर्ने शुल्कहरुलाई अनलाइन मार्फत गर्नका लागि इच्छुक विद्युतीय भुक्तानी सेवा प्रदायकहरुलाई पेमेन्ट गेटवे सेवा प्रदान गर्नका लागि आह्वान गरेको छ ।
प्राधिकरणले अनलाइन भुक्तानीका लागि आफ्नो प्रणालीमा जोडिनका लागि त्यस्ता सेवा प्रदायकहरुलाई दरखास्त पेश गर्न सूचना जारी गरेको छ । यसरी प्राधिकरणको विद्युतीय भुक्तानी सेवा प्रदायकमा जोडिनका लागि सम्बन्धित कम्पनीले आफ्नो संस्थाको दर्ता तथा नविकरण भएको प्रमाणपत्र पेश गर्नु पर्नेछ ।
त्यस्तै सम्बन्धित कम्पनीले आफ्नो करचुक्ता प्रमाणपत्र पेश गर्नुपर्नेछ । यसका साथै आफ्नो दररेट सहितको प्रस्ताव पेश गर्नु पर्नेछ । अन्य निकायहरुमा आवद्ध भएको विवरण पनि पेश गर्न सकिनेछ । नेपाल राष्ट्र बैंकले पछिल्लो समय विद्युतीय भुक्तानीलाई प्रोत्साह गर्दै आएको छ । सोहि अनुरुप बीमा कम्पनीहरुले पनि विभिन्न विद्युतीय भक्तानी सेवा प्रदायकलाई आफ्नो प्रणालीमा जोडेर सहजै बीमा शुल्क भुक्तानी गर्न मिल्ने व्यवस्था मिलाएका छन् ।
बीमा प्राधिकरणले भने एउटा मात्रै प्रणालीलाई जोड्ना बीमक तथा अभिकर्ताले गुनासो गर्दै आएका छन् । एउटा मात्रै प्रणालीलाई आवद्ध गर्दा कतिपय अवस्थामा उक्त प्रणालीमा अवरोध आउदा भुक्तानी नै गर्न गाह्रो पर्ने गर्छ ।
