काठमाडौं । शेयर बजार २२ महिना यताकै सबैभन्दा तल्लो विन्दुमा झरेको छ । मंगलबार नेप्से सूचक ३८.८१ अंकले घटेर १८३७.६० अंकमा झरेको छ । बैंकहरुले निक्षेपको व्याजदर बढाए सँगै कर्जाको पनि व्याजदर बढ्ने भन्दै लगानीकर्ता त्रसिद देखिएका हुन् । एकातिर तरलता अभावको चरम अवस्था अर्को तर्फ सरकारले नयाँ स्टक एक्सचेन्ज र नयाँ ब्रोकर लाइसेन्सका लागि आवेदन आह्वान गरे सँगै अहिलेका ब्रोकरहरु त्रसिद छन् । बजार खोसिने डरले गर्दा ब्रोकरले नै बजार घटाउन जोड बल गरिरहेका छन् ।
मंगलबार शेयर बजार २.०७ प्रतिशतले तल झर्दा कारोबार रकम एक अर्ब २२ करोड रुपैयाँको भएको छ । आज सम्पुर्ण सूचक तथा उपसूचक तल झरेको छ । आज सबैभन्दा धेरै कृषि विकास बैंकको २ प्रतिशतले मूल्य बढेको छ ।
पछिल्लो समय शेयर बजार लगातार तल झरिरहेको छ । विगत एक वर्षको अवधिमा शेयर बजार सर्वाधिक ३१९९ देखि तल झर्ने क्रममा आज १८३७ अंकमा झरेको छ । यस अवधिमा १३६२ अंकले तल झरेको छ । बजार बियरिस ट्रेण्डमा रहेकाले अहिले लगानीकर्ता डिप्रेस मुडमा छन् । घरजग्गादेखि लिएर समग्र अर्थतन्त्र नै लगातार तल झरिरहेको छ । यसको असर शेयर बजारमा अधिक देखिएको हो ।
