काठमाडौं । विद्युतीय सवारी साधन उत्पादन कम्पनी बीवाइडी अटो इन्डष्ट्रिजको आधिकारीक वितरक साइमेक्स इंक प्रालिले गाडीको मूल्य बढाएको छ । कम्पनीले विगत दुई महिनाअघि नै गाडीको मूल्य समायोजन गर्नुपर्नेमा बजारमा देखिएको समस्याका कारण स्थीर राख्ने प्रयास गरेको कम्पनीले जनाएको छ ।
नेपालमा डलरको मूल्यसँग चीन लगाएत तेस्रो देशबाट आउने गाडीको मूल्य प्रभावित हुने गरेको छ । गाडीको मूल्य कायम गर्दाको डलर मूल्य र हालको डलर मूल्यमा बृद्धि भई ७ प्रतिशतको अन्तर रहेको छ ।
हालको अफ्ठ्यारो परिस्थितिलाई ध्यानमा राख्दै डलरको कारण उत्पन्न मूल्य वृद्धि धेरै हुने भएपनि हामीकले बीवाइडी इ सिक्समा १ लाख ५० हजार रुपैयाँले मूल्य समायोजन गरी नयाँ मूल्य ५९ लाख रुपैयाँ कायम गरेको कम्पनीले जनाएको छ । साथै एमथ्री मल्टीपर्पाेज भ्यानमा १ लाख २ हजार रुपैयाँले मूल्य समायोजन गरी ४५ लाख ५२ हजार रुपैयाँ मूल्य कायम भएको छ ।
पछिल्लो १५,१६ महिनामा डलरको एक्सचेन्ज रेटमा ब्यापक वृद्धि भएको कारण मूल्य बढाउन परेको साइमेक्स इंकका सीईओ साहिल श्रेष्ठले बताए । तर यसअघि नै बुकिङ गरेका ग्राहकले भने मूल्य वृद्धि हुनु अगावैको मुल्यमा गाडी पाउने उनले बताए ।
वीवाइडीको लेटेष्ट टेक्नोलोजीमा आधारित ब्लेड ब्याट्री यसको सबैभन्दा बलियो पक्ष हो । ब्लेड ब्याट्री सुरक्षाको हिसाबले अब्बल र लङ रेन्जका लागि उपयुक्त रहेको छ । इ सिक्समा भने कम्कपनीले ७१.७ किलोवाट आवर क्षमताको ब्याट्री र ७० किलोवाट क्षमताको मोटर जडान गरिएको छ । फुल चार्जमा यसको रेन्ज ५२२ किलोमिटर रहेको छ । साथै, ग्राहकले ७ किलोवाट क्षमताको एसी चार्जर पनि गाडीसँगै पाउने छन् ।