काठमाडौं । बीमा समितिले सम्पुर्ण जीवन बीमा कम्पनीहरुलाई असार मसान्त भित्र अभिकर्ताहरुलाई प्रवाह भएको कर्जा सापटी असुल उपर गर्न निर्देशन दिएको छ । बीमा कम्पनीहरुले अभिकर्तालाई प्रवाह गरेको कर्जा तथा सापटीको विवरणलाई हेर्दा सन्तोषजनक रुपमा असुल नभएको पाइए पछि समितिले सम्पुर्ण कम्पनीहरुलाई परिपत्र जारी गर्दै यस्तो निर्देशन दिएको हो ।
बीमा समितिका अनुसार सम्पुर्ण कर्जा असुली नभएकोले अख्तियार दुरुपयोग अनुसन्धान आयोगबाट समेत बारम्बार ताकेता हुँदै आइरहेको छ ।
बीमा समितिले पहिलो पटक २०७८ बैशाख २ गते सम्पुर्ण जीवन बीमा कम्पनीहरुलाई पत्र मार्फत अभिकर्ताहरुलाई प्रवाह भएको कर्जा तथा सापटी २०७८ असार मसान्त भित्र फरफार गर्न निर्देशन दिएको थियो । तर अभिकर्ताहरुको चर्को विरोध तथा बीमा कम्पनीहरुको अनुरोधमा बीमा समिति केहि चलक देखिएको थियो ।
अभिकर्ताहरुलाई व्यवसाय प्रवर्द्धनका लागि दिइएको गाडी तथा मोटरसाइकल कर्जामा भने बीमा समिति केहि लचक देखिदै आएको छ । तर कर्जा तथा सापटीलाई पनि समितिले मानिरहेको थिएन । बीमा कम्पनीहरुले अभिकर्ताहरुलाई फकाउन विभिन्न सेवा सुविधा दिने गरेका छन् । कम्पनीहरुले दिने यस्ता सेवा सुविधाको दुरुपयोग गर्दै अभिकर्ताहरुले प्रथम बीमा शुल्क आर्जन बढाउन प्रयोग गरेपछि समिति आक्रोसित हुँदै आएको छ । त्यसमा पनि बीमा कम्पनीहरुले अभिकर्ताहरुलाई विना धितो मूल्याङ्कन करोडौ रुपैयाँ कर्जा दिनु आफैमा गैर कानुनी मानिन्छ ।
यसरी बीमा कम्पनीहरुले गैरकानुनी रुपमा कर्जा प्रवाह भएको कुरा अख्तियारसम्म पुगिसकेको छ । बीमा कम्पनीहरु बीमितले जम्मा गरेको बीमा शुल्कबाट सञ्चालन हुन्छन् । बीमितले बुझाएको बीमा शुल्कलाई कम्पनीहरुले मनलाग्दी दुरुपयोग गर्न पाउदैनन् । अहिले पनि बीमा कम्पनीहरुले ठुला ठुला अभिकर्ताहरुलाई करोडौ रुपैयाँ कर्जा दिदै आएका छन् ।
