काठमाडौं । नेपाल राष्ट्र बैंकले जेठ १२ गतेदेखि ३ अर्ब ३ करोड ६ लाख ६० हजार बराबरको नागरिक बचतपत्र विक्री गर्ने भएको छ । राष्ट्र बैंकले पाँच वर्षे अवधिको वार्षिक ११ प्रतिशत ब्याजदर रहेको नागरिक बचतपत्र विक्री गर्न लागेको हो ।
यस बचतपत्रमा जेठ १२ गतेदेखि जेठ ३१ गतेसम्म बोलपत्र पेश गर्न सकिने जनाएको छ । यस बचतपत्र नेपाली नागरिकले मात्र खरीद गर्न पाउने जानकारी राष्ट्र बैंकले दिएको छ ।
इच्छुक खरीदकर्ताहरुले यो बचतपत्र खरीदका लागि न्यूनतम १० हजारदेखि अधिकतम १० हजारले माग गर्दा निःशेष भाग जाने अंकसम्म माग गर्न सक्नेछन् । असार ८ गतेदेखि निष्काशन गरिने यस बचपत्रको साँवा भुक्तानी मिति २०८४ साल असार ८ गते तय भएको छ ।
यस बचतपत्रको ब्याज आफुलाई पायक पर्ने वाणिज्य बैंकहरू,बजार निर्माताको इजाजतपत्र लिएका बैंक तथा वित्तीय संस्थाहरू र काठमाडौं उपत्यकाबाहिरका नेपाल राष्ट्र बैंकका कार्यालयहरूबाट लिन सकिने राष्ट्र बैंकले जनाएको छ ।
