काठमाडौं । बीमा समितिले काभ्रेपलाञ्चोक जिल्लाको तेमाल गाउँपालिका र सिन्धुपाल्चोक जिल्लाको चौतारा साँघाचोकगढी नगरपालिकामा बीमा सम्बन्धी जनचेतनामुलक कार्यक्रम सम्पन्न गरेको छ । बीमा समितिका निर्देशक कमल रेग्मीको संयोजकत्वमा सम्पन्न भएको यस कार्यक्रममा सहायक निर्देशक पुर्ण बहादुर थापा र सहायक प्रथम श्याम सुन्दर नगरकोटीको सहभागिता रहेको थियो ।
निर्देशक रेग्मीले दुबै कार्यक्रममा बीमा सम्बन्धी जानकारीमुलक प्रस्तुती दिएका थिए । उनले स्थानीय निकायहरुलाई आफ्नो सेवा सुविधामा बीमालाई पनि टाइअप गर्न अनुरोध गरेका छन् ।
तेमाल गाउँपालिकामा अध्यक्ष सलाम सिं तामाङ, उपाध्यक्ष दुर्गा माया तामाङ, सम्पुर्ण वडाका जनप्रतिनिधिहरु, कृषक, व्यवसायी सहित ७० जना भन्दा धेरैको सहभागिता थियो । यस क्षेत्रका बासिन्दामा बीमा सम्बन्धी त्यति धेरै ज्ञान नभएको पाइएको छ ।
त्यस्तै सिन्धुपाल्चोकको साँगाचोकगढी नगरपालिकामा पनि मेयर अमान सिं तामाङ, उपमेयर जानुका पराजुली, सम्पुर्ण वडाका जनप्रतिनिधिहरु, व्यवसायी, बीमा कम्पनीका शाखा कार्यालयका प्रमुखहरु, स्थानीय कृषकहरु सहित ८० भन्दा धेरैको सहभागिता थियो ।
यस नगरपालिकाका मेयर तामाङले समितिको अनुरोधलाई स्वीकार गर्दै आफ्नो क्षेत्रमा पनि बीमाका लागि आवस्यक बजेट छुट्टाएउने प्रतिवद्धता व्यक्त गरेका छन् । त्यस्तै सहभागीहरुले कृषि बीमा, कोरोना बीमा, दाबी भुक्तानीको विषयमा प्रश्न गरेका थिए ।
