काठमाण्डौं । संविधान दिवसको अवसरमा राष्ट्रपतिको कार्यालयबाट विभूषित हुने नौ सय भन्दा बढीको सूचीमा बीमा सेवा क्षेत्रबाट दुईजना बहालवाला प्रमुख कार्यकारी अधिकृत चयनमा परेका छन् ।
मन्त्री परिषद्को सिफारिसमा शिखर इन्स्योरेन्स लिमिटेडका प्रमुख कार्यकारी अधिकृत दीपप्रकाश पाण्डे र एनएलजी इन्स्योरेन्सको प्रमुख कार्यकारी अधिकृत सुनिलबल्लभ पन्तलाई प्रबल जन सेवा श्री पदकबाट सम्मान् गर्ने घोषणा गरिएको हो ।
२०६१ मंसिरमा संचालनमा आएको शिखर इन्स्योरेन्स कं. लि.मा शुरुमा महाप्रबन्धक पदमा कार्यरत पाण्डे २०७३ देखि प्रमुख कार्यकारी अधिकृतको रुपमा कार्यरत छन् । प्रमुख कार्यकारी पदमा शिखर इन्स्योरेन्समा यो उनको दोश्रो कार्यकाल हो । पाण्डेसँग बीमा क्षेत्रमा दुई दशकभन्दा लामो कार्य अनुभव रहेको छ। त्यसैगरी सुनिलबल्लभ पन्त २०७५ असोज २४ गतेदेखि एनएलजी इन्स्योरेन्सको प्रमुख कार्यकारी पदमा कार्यरत छन् । एनएलजी इन्स्योरेन्समा सहायक पदबाट बीमा क्षेत्रमा सेवा शुरु गरेका पन्तसँग दुई दशकभन्दा लामो कार्य अनुभव रहेको छ ।
