काठमाडौं । महिला लघुवित्त वित्तीय संस्था लिमिटेडले गत आर्थिक वर्षको चौथो त्रैमासको वित्तीय विवरण प्रकाशन गरेको छ । कम्पनीले यस अवधिसम्म ९ करोड २९ लाख ८२ हजार रुपैयाँ खुद नाफा आर्जन गरेको छ । कम्पनीले अघिल्लो वर्षभन्दा गत वर्ष १६७ दशमलव ८६ प्रतिशतले नाफा बृद्धि गर्न सफल भएको छ । अघिल्लो वर्षको सोही अवधिमा कम्पनीले ३ करोड ४७ लाख १३ हजार रुपैयाँ मात्र नाफा गरेको थियो ।
गत वर्ष कम्पनीको सञ्चालन नाफा पनि १७७ दशमलव ८८ प्रतिशतले वृद्धि भएको छ । अघिल्लो वर्ष ३ करोड ८१ लाख ७६ हजार सञ्चालन नाफा गरेको कम्पनीले गत वर्षको सोही अवधिमा १० करोड ६० लाख ८५ हजार रुपैयाँ संचालन मुनाफा गरेको छ ।
समिक्षा अवधिमा कम्पनीको संचालन मुनाफा ८७ दशमलव ४६ प्रतिशतले बृद्धि भएको छ । यस अवधिमा कम्पनीले २४ करोड ४ लाख ८३ हजार रुपैयाँ संचालन मुनाफा आर्जन गरेको छ । कम्पनीको खुद ब्याज आम्दानी अघिल्लो वर्ष १२ करोड ८२ लाख ८२ हजार रुपैयाँ मात्र भएको थियो ।
कम्पनीको चुक्ता पूँजी १० करोड पुगेको छ । गत वर्ष कम्पनीको जगेडा कोष रकम पनि ७२ दशमलव ७२ प्रतिशत वृद्धि भएको छ । यस अवधिमा कम्पनीको जगेडा कोषमा २२ करोड ८ लाख ९६ हजार रुपैयाँ संचिती रहेको छ ।
समिक्षा अवधिमा कम्पनीले २ अर्ब २४ करोड ६८ लाख ७३ हजार कर्जा सापटी लिए ३ अर्ब ३३ करोड ६७ लाख ८५ हजार रुपैयाँ कर्जा लगानी गरेको छ । अघिल्लो आर्थिक वर्षको सोही अवधिको तुलनामा कम्पनीको कर्जा लगानी ९१ दशमलव ९६ प्रतिशतले बढी हो । अघिल्लो वर्षभन्दा गत वर्ष कम्पनीको निक्षेप संकलन भने साढे ४० प्रतिशतले बृद्धि भएको छ । यस अवधिमा कम्पनीले ९२ करोड ८० लाख ९० हजार रुपैयाँ निक्षेप संकलन गरेको छ ।
कम्पनीको निष्क्रिय कर्जा अघिल्लो वर्ष शून्य दशमलव ७८ प्रतिशत रहेको थियो । गत वर्ष १ दशमलव ७१ प्रतिशत रहेको छ । यस अवधिमा प्रतिशेयर आम्दानी ९२ रुपैयाँ ९८ पैसा रहेको छ ।
