काठमााडौं । नबिल बैंक लिमिटेडले साउन १० गतेदेखि ऋणपत्र निष्काशन तथा विक्री खुला गर्ने भएको छ । बैंकले ७ वर्ष अवधिको ‘८ प्रतिशत ब्याजदरमा नबिल डिबेन्चर २०८५’ निष्काशन तथा विक्री खुला गर्न लागेको हो ।
बैंकले प्रतिकित्ता १ हजार रुपैयाँअंकित दरका ३ अर्ब रुपैयाँ बराबरको ३० लाख कित्ता ऋणपत्र निष्काशन गर्न लागेको हो । जसमध्ये १ अर्ब २० करोड बराबरको १२ लाख कित्ता सर्वसाधारणलाई विक्री गर्नेछ भने बाँकी १ अर्ब ८० करोड बराबरको १८ लाख कित्ता व्यक्तिगत तवरबाट विक्री गर्ने बैंकले जानकारी दिएको छ । सर्वसाधारणका लागि विक्री गर्ने ऋणपत्रमध्ये ५ प्रतिशत अर्थात ६० हजार कित्ता सामूहिक लगानी कोषका लागि छुट्याएको छ ।
उक्त ऋणपत्र खरीदका लागि छिटोमा साउन १३ गतेसम्ममा आवेदन दिनु पर्नेछ भने उक्त अवधिसम्ममा पूर्ण आवेदन नपरेमा साउन २४ गतेसम्म आवेदन दिन सकिनेछ । आववेदकले न्यूनतम २५ कित्तादेखि अधिकतम सम्पूर्ण कित्तासम्मका लागि आवेदन दिन सक्नेछन् ।
बैंकलाई इक्रा नेपालले निकै कम कर्जा जोखिम जनाउने ‘इक्राएनपी आईआर डबल ए माइनस’ रेटिङ प्रदान गरेको छ । बैंकको ऋणपत्र निष्काशन तथा विक्री प्रबन्धकमा हिमालयन क्यापिटल लिमिटेड रहेको छ ।
आवेदकले विक्री प्रबन्धकसँगै आस्बा सेवामा सहभागी सम्पूर्ण बैंक तथा वित्तीय संस्था र तीनका शाखा कार्यालयबाट आवेदन दिन सकिने व्यवस्था छ ।
