काठमाडौं । प्रभु लाईफ इन्स्योरेन्स कम्पनीको शेयर कारोबार सुरु भएको दुई साता पुग्न लाग्दा समेत स्वतन्त्र रुपमा खरिद बिक्री हुन सकेको छैन । शेयर कारोबार भएको नौ दिन सम्ममा पनि कारोबार सुरु हुनुअघि तोकिएको अधिकतम् मूल्यको सीमामा पुग्न नसक्नु र शेयर बिक्रेता शुन्य हुनुले प्रभु लाईफ इन्स्योरेन्स कम्पनीको शेयर कारोबार सेटिङमा मात्रै भइरहेको देखिएको छ ।
आज अपरान्ह सम्मको अवस्था हुँदा प्रभु लाईफ इन्स्योरेन्स कम्पनीको जम्मा ३० कित्ता शेयर कारोबार भएको छ । उक्त कम्पनीको शेयर खरिद गर्न छ हजार पाँच सय २९ जना लगानीकर्ता लाईनमा देखिएका छन् । तर, उक्त कम्पनीको शेयर बिक्री गर्न कोही पनि इच्छुक देखिएका छैनन् ।
आज अपरान्हसम्ममा २१ लाख तीन हजार ३०२ कित्ता शेयर खरिद गर्न अर्डर गरेका छन् । तर, उक्त मूल्यमा शेयर बिक्री गर्ने कोही पनि नहुँदा एकपक्षिय हुँदै आएको छ । कारोबार सुरु भएदेखि नै प्रभु लाईफ इन्स्योरेन्स कम्पनीको शेयरमा बिक्रेता शून्य, खरिदकर्ताको लामो लाइन रहँदै आएको छ ।
कम्पनीको बास्तविक शेयर मूल्य तय नहुँदा बजारमा बिक्रेता आएका छैनन् भने खरिदकर्ताको लामो लाईन छ । सुरुमा तोकिएको अधिकतम मूल्य प्रतिकित्ता ३२८.६८ रुपैयाँ तोकिएको भएपनि शेयर कारोबार भने १३७ रुपैयाँमा भएको थियो । यो समाचार तयार पार्दासम्म कम्पनीको शेयर मूल्य २६९ रुपैयाँमा अन्तिम कारोबार भएको छ । म्याचिङ भई पहिलो कारोबार हुँदा अधिकतम् मूल्यमा कारोबार भएको भए अहिलेसम्म ५०० रुपैयाँ प्रतिकित्ता पुगिसक्ने थियो ।
पहिलो कारोबार न्यूनतम् मूल्यमा हुँदा दैनिक १० प्रतिशत सर्किटका कारण प्रभु लाईफ इन्स्योरेन्स कम्पनीको शेयर मूल्य खरिदकर्ता र बिक्रेताले चाहेको बास्तविक मूल्यमा हुन सकेको छैन । बिक्रेताले बास्तविक मूल्य नआई शेयर बिक्री गर्न नचाहेकोले अहिले भइरहेका शेयर कारोबार सेटिङमा भइरहेको अनुमान गरिएको छ ।
