काठमाडौं । माउन्टेन इनर्जीले निष्काशन गरेको आईपिओ बाँडफाँड सम्पन्न भएको छ । आज विहान बाँडफाँड गरिएको आईपिओमा एक लाख ८३ हजार २१ जनाले १० कित्ताको दरले शेयर पाएका छन् । थप पाँच जनाले गोलाप्रथाबाट ११ कित्ताको दरले शेयर पाएका छन् ।
माउन्टेन इनर्जी नेपालले बिक्रीमा ल्याएको आईपीओ केहीबेरअघि बाँडफाँड भएको छ । बिक्री प्रबन्धक नबिल इन्भेष्टमेन्ट बैंकिङ्गको कार्यालय नरायणचौरमा कम्पनीको आईपीओ बाँडफाँड भएको कम्पनीले जनाएको छ । कूल ६ लाख ५३ हजार २ सय ९१ जनाले आवेदन दिएको आईपिओमा चार लाख ६८ हजार ५४९ जनाको हात खाली भएको छ । आवेदन दिएका मध्ये एक हजार सात सय १६ जनाको आवेदन रद्द भएको कम्पनीले जनाएकोछ ।
गत कार्तिक २६ गते देखि मंसिर २ गते सम्म जारी गरिएको आईपिओ कूल कुल १९ लाख ६८ हजार २७ कित्ता शेयर निष्काशन गरेकोमा कर्मचारी र सामूहिक लगानी कोषलाई छुट्टाएर १८ लाख ३० हजार २६५ कित्ता सर्वसाधारणको लागि वितरण गरिएको हो । कम्पनीले केहीबेरपछि नतिजा प्रकाशन गर्ने जनाएको छ ।
