काठमाडौं । नेपाल स्टक एक्सचेन्जको तथ्याङ्क अनाधिकृत रुपमा लिएर आफुखुशी आफ्नो स्वार्थमा विश्लेषण गर्ने कार्य रोक्न नयाँ व्यवस्था गरिएको छ । नेपाल स्टक एक्सचेन्जले यही पुस १ गतेदेखि लागू गरेको तथ्याङ्क सम्बन्धी कार्यविधिमा व्यक्तिगत प्रयोगका कम्पनीगत तथ्याङ्कहरु निःशुल्क पाइने तर नेप्सेको तथ्याङ्कहरु लिएर व्यवसाय गर्ने सञ्चार माध्यमहरुलाई समेत शुल्कका दायरामा ल्याइएको छ ।
नयाँ व्यवस्थापछि तथ्याङ्क विश्लेषण गर्दा जथाभावी रोकिने नेप्सेले जनाएको छ । नेप्सेका कार्यकारी प्रमुख चन्द्र सिंह साउदले भने, ‘व्यक्तिगत प्रयोगका लागि कम्पनी विशेषका तथ्याङ्कहरुमा कुनै शुल्क लाग्दैन । वेभसाईटमा पनि तथ्याङ्क निःशुल्क रुपमा नै हेर्न पाइन्छ । तर, नेप्सेको तथ्याङ्क विश्लेषण गर्ने प्रयोजनका लागि भने शुल्क तोकिएको हो ।’
नेप्सेले तथ्याङ्क लिएर प्रकाशन गर्ने सञ्चार माध्यमहरुलाई समेत शुल्कका दायरामा ल्याएको छ । सो अनुसार मासिक न्यूनतम ५०० रुपैयाँदेखि ७५ हजार रुपैयाँसम्म शुल्क तोकिएको छ । सञ्चार माध्यमहरुले नेप्सेबाट तथ्याङ्क लिएर विश्लेणात्मक प्रयोजनको लागि ५०० रुपैयाँ देखि १० हजार रुपैयाँसम्म प्रति महिना शुल्क तिर्नुपर्ने व्यवस्था गरिएको छ । अहिले केही सञ्चार माध्यमहरुले मात्रै यस्तो व्यवस्था गरेका छन् । ति सञ्चार माध्यमहरुले नेप्सेबाट निःशुल्क तथ्याङ्क लिएर सेवाग्राहीलाई शुल्क लिएर तथ्याङ्क दिँदै आएका छन् ।
नयाँ व्यवस्था अनुसार नेप्सेले तथ्याङ्कको सही प्रयोग भए–नभएको नियमित अनुगमन गर्नेछ । गलत प्रयोग भएको पाइएमा जरिवना तोक्ने तथा दण्डित गर्ने व्यवस्था तथ्याङ्क प्रयोग सम्बन्धी कार्यविधिमा गरिएको छ ।
