काठमाडौं । प्रभु बैंकको नयाँ सिष्टमले पनि प्रभावकारी रुपमा काम नगरेपछि बैंकका कर्मचारी तथा सेवाग्राहीले समस्या भोग्न बाध्य हुँदै आएका छन् । प्रभु बैंकले गत जेठ १५ गतेदेखि चार दिनसम्म सम्पूर्ण बैंकिङ कारोबार बन्द गरेर फिनाकल कोर बैंकिङ सफ्टवयेर जडान गरेको थियो । तर, बैंकको सिष्टम अझै समस्यारहित हुन नसेको कर्मचारीहरुले गुनासो गरेका छन् ।
यही असोज १८ गते आइतबार अपरान्ह १५ः०० बजेदेखि १५ः३३ बजेसम्म करिब ३३ मिनेट प्रभु बैंकको सिष्टम बन्द भएको सो बैंकमा रकम साट्न लाइन बसेका एक सेवाग्राहीले बताए । बैंकको सिष्टम बन्द हुँदा थप एक घण्टा लाइन बस्न बाध्य भएका पीडितहरुको गुनासो छ । प्रभु बैंकका एक कर्मचारीले दिएको जानकारी अनुसार प्रभु बैंकको नयाँ सिष्टमले समेत राम्रो काम गरेको छैन । प्रभु बैंकका एक कर्मचारीले दिएको जानकारी अनुसार बैंकको सिष्टममा बारम्बार समस्या आउने गरेको छ । प्राबिधिक समस्याको रुपमा कहिले सर्भर नचल्ने त कहिले सफ्टवयरले काम नगर्ने समस्या आउने गरेको कर्मचारीहरुको भनाई छ । प्रभु बैंकले आईटी सम्बन्धी हेर्नको लागि छुट्टै शाखा नै खडा गरेर परिचालन गरेपनि प्रभावकारी नतिजा दिन सकेको छैन ।
बैंकको सिष्टममा पटक पटक समस्या आउनुमा सफ्टवयेरको समस्या हो या इन्टरनेट सेवा प्रदायकको भन्ने खुल्न सकेको छैन । प्रभु बैंकको सर्भरमा ब्याण्डविथ सेवा सुबिसुले दिएको पत्ता लागेको छ । सुबिसुबाट ब्याण्डविथ सेवा लिइरहेका अधिकांश कम्पनीहरुले समस्या भोग्दै आएका छन् । सुबिसुकै ब्याण्डविथ लिएको नेप्सेमा बारम्बार समस्या आइरहेको छ । प्रभु बैंकले पनि सुबिसुकै सेवा लिएको पाइएको छ । रोचक कुरा के छ भने नेपाल स्टकलाई ब्याण्डविथ दिएकै सर्भरबाट सुबिसुले वल्र्डलिङ्कसँग ब्याण्डविथ किनेर सेवा दिइरहेको पाइएको छ ।
भारतको कर्नाटकमा रहेको एडभर्भ कम्पनीले तयार पारेको सफ्टवयर विश्वका १०० देशमा प्रयोग गर्दै आएको सो कम्पनीले आफ्नो वेभसाईटमा उल्लेख गरेको छ । विश्वका यति धेरै देशहरुमा काम गर्दै आएको कम्पनीले निर्माण गरेको सफ्टवयर जडान गरेपछि पनि सर्भर समस्या हल हुन नसकेपछि बैंकिङ कारोबारमा संलग्न कर्मचारीहरु आजित भएको गुनासो गरेका छन् ।
स्रोतका अनुसार उक्त सफ्टवयेर जडान गरेपछि २० अंकको बैंक खाता नम्वरहरु १६ वटा अंकमा झारिएको छ । बैंकले करोडौं रुपैयाँ खर्च गरेको, लाखौं सेवाग्राहीको खाता नम्वर नै परिवर्तन गरेर जडान गरेको सफ्वटयर काम नगरेपछि सेवाग्राहीले बैंकका काउन्टरमै आक्रोश व्यक्त गर्न थालेका छन् । बैंकको सफ्टवयरमा समस्या आउँदा कर्मचारी र सेवाग्राहीले सास्ती भोग्नु परेको बारेमा जिज्ञाशा राख्दा बैंकका सिईओ अशोक शेरचनले कुनै प्रतिक्रिया दिन चाहेनन् ।
