काठमाडौं । युनाईटेड इन्स्योरेन्स कम्पनीमा नयाँ सिईओ नियुक्त गर्ने प्रस्ताव बीमा समितिमा दर्ता भएको छ । दुई साताअघि बसेको युनाईटेड इन्स्योरेन्स कम्पनीको सञ्चालक समितिको बैठकले कम्पनीको सिईओमा जीवन भट्टराईलाई नियुक्त गर्ने निर्णय गरी सहमतिको लागि बीमा समितिमा पठाएको हो । बीमा समितिबाट सहमति प्राप्त हुने वित्तिकै भट्टराईलाई सिईओ नियुक्त गरिने युनाईटेड इन्स्योरेन्स कम्पनीका एक सञ्चालकले बताए ।
युनाईटेड इन्स्योरेन्समा चौधरी ग्रुप र एनई ग्रुपको सबैभन्दा धेरै लगानी छ । चौधरी ग्रुप र एनई ग्रुपबीच पद बाँडफाँड सहमति अनुसार एनई ग्रुपले अध्यक्ष र चौधरी ग्रुपले सिईओ पद लिन लागेको हो । सो सहमति अनुसार चौधरी ग्रुपका कर्मचारीको रुपमा रहेका अध्यक्ष भरत बहादुर कार्कीलाई हटाएर एनई ग्रुपका रविभक्त श्रेष्ठ अध्यक्ष बनिसकेका छन् । अब चौधरी ग्रुपको तर्फबाट नयाँ सिईओ नियुक्ती प्रक्रिया अघि बढाइएको हो ।
सेन्चुरी बैंकमा डेपुटी सिईओको रुपमा कार्यरत जीवन भट्टराईलाई चौधरी ग्रुपको तर्फबाट युनाईटेड इन्स्योरेन्समा गत कार्तिकमा सञ्चालक नियुक्त गरेको थियो । सिईओ बन्ने भएपछि भट्टराईले गत असार ५ गते सञ्चालकबाट राजिनामा दिएका थिए । भट्टराई अनुभवी बैंकर हुन् । युनाईटेड इन्स्योरेन्समा उनको प्रवेशपछि कम्पनीले आक्रामक व्यापार गर्ने विश्वास लिइएको सो कम्पनीका एक सञ्चालकले बताए ।
