काठमाडौं । नेपाल पुनर्बीमा कम्पनीले आर्थिक वर्ष २०७६ /७७ को तेस्रो त्रैमासको अपरिष्कृत वित्तीय विवरण प्रकाशन गरेको छ । कम्पनीले गत आर्थिक वर्षको चैत मसान्तसम्म जीवन बीमा व्यवसायबाट ९ करोड १० लाख रुपैयाँ तथा निर्जीवन व्यवसायबाट ८२ करोड ५० लाख रुपैयाँ गरी कुल ९१ करोड ६१ लाख खुद नाफा कमाएको छ ।
अघिल्लो आर्थिक वर्षको सोही अवधिको तुलनामा कम्पनीको नाफा २ दशमलव ७८ प्रतिशतले बढी हो । कम्पनीले अघिल्लो आर्थिक वर्षको यसै अवधिसम्ममा जीवन बीमा व्यवसायबाट ९ करोड ९ लाख रुपैयाँ र निर्जीवन बीमा व्यवसायबाट ८० करोड ४ लाख रुपैयाँ गरी कुल ८९ करोड १३ लाख रुपैयाँ नाफा कमाएको थियो ।
चैत मसान्तसम्म कायम ८ अर्ब ४० करोड रुपैयाँ चुक्ता पूँजी रहेको यस कम्पनीको जीवन बीमा व्यवसाय र निर्जीवन बीमा व्यवसाय गरी जगेडा कोषमा कुल ३ अर्ब ३१ करोड रुपैयाँ संचिती रहेको छ भने जीवन बीमा व्यवसाय र निर्जीवन बीमा व्यवसाय गरी बीमाकोषमा १ अर्ब ४७ करोड रुपैयाँ रहेको छ ।
कम्पनीले यस अवधिसम्म निर्जीवन बीमा व्यवसायबाट ४ अर्ब ६२ करोड रुपैयाँ र जीवन बीमा व्यवसायबाट ३१ करोड २२ लाख रुपैयाँ गरी कुल ४ अर्ब ९४ करोड खुद बीमाशुल्क संकलन गरेको छ ।
त्यस्तै, कम्पनीले यस अवधिसम्ममा निर्जीवन बीमा व्यवसायतर्फबाट १ अर्ब ७४ करोड १६ लाख रुपैयाँ खुद दावी भुक्तानी गरेको छ भने जीवन बीमा व्यवसायबाट १० करोड २८ लाख ४० हजार रुपैयाँ खुद दावी भुक्तानी गरेको छ ।
