काठमाडौं । कोरोना भाइरस स्थानीय तहमा फैलिएको आशंका गरिएको बीरगन्जमा एक प्रख्यात उद्योगका सिईओको मृत्यु भएको छ । बीरगन्जस्थित जगदम्बा इन्टरप्राईजेजका ५६ बर्षिय सिइओको कोभिडबाट गएराति मृत्यु भएको गण्डक अस्थायी कोभिड अस्पतालले जनाएको छ । सो कम्पनीमा कूल ९०० जना कर्मचारी कार्यरत रहेको र हाल सबै कर्मचारीहरु घरैमा क्वारेन्टाईनमा बसेको जनाए । सो उद्योग सिल गरिएको सो कम्पनीका एक कर्मचारीले जानकारी दिए ।
१५ दिन अघि ज्वरो आएपछि अस्पताल पुगेका थिए । अस्पतालमा पिसिआर चेकजाँच गर्दा कोरोना पोजेटिभ फेला परेपछि कोभिड अस्पतालमा उपचार भइरहेको थियो । विगतमा एक पटक मुटु रोगको उपचार गराइसकेका ति भारतीय नागरिक यही साउन ७ गतेदेखि उपचाररत थिए । हिजो सास फेर्न गाह्रो भएपछि कोभिड अस्पताल पुर्याइएर भेन्टिलेटमा राखिएकोमा राति साढे ११ बजे उनको मृत्यु भएको हो ।
जगदम्बा इन्टरप्राईजेजका अनुसार एक साता अघि जगदम्बा इन्टरप्राईजेजका अन्तर्गत कार्यालयमा काम गर्ने ४५ जना कर्मचारीहरुको कोरोना बीमा गरिएको थियो । मृतक सिईओको भने भारतीय नागरिक भएकोले कोरोना बीमा गर्न मिलेका थिएन । जगदम्बा इन्टरप्राईजेज शंकर ग्रुप नजिकका अनिल रुङ्गटा, रमेश अग्रवाल समुहको लगानीमा सञ्चालित पाईप उद्योग हो ।
