काठमाडौं । वसुन्धरामा अवस्थित साउथवेस्टन स्टेट कलेजले विद्यार्थीहरुलाई लक्षित गर्दै करियर इन मेनेजमेन्ट कार्यक्रम तथा आयोजना गरेको दसौं विज्ञान प्रदर्शनी कार्यक्रम सम्पन्न गरेको छ । उपत्यकाका विभिन्न स्कुल र कलेजका युवा वैज्ञानिकहरूद्वारा निर्मित विज्ञान कलामा ३० हजारभन्दा बढीले अवलोकन गरेको सो कलेजले जनाएको छ ।
माघ २३ गते सुरु भएको दुई दिने सो कार्यक्रम माघ २४ गते समापन भएको छ । प्रदर्शनी समापन कार्यक्रमलाई सम्बोधन गर्दै टोखा महानगरपालिका नगर प्रमुख प्रकाश अधिकारीले देशलाई आत्मनिर्भर बनाई अगाडि बढ्न यस्ता प्रदर्शनीहरू सहयोगी हुने बताए । साथै उनले सरकारले यस्ता खालका बौद्धिक र सिर्जनात्मक कार्यहरूको प्रवद्र्धनका लागि आगामी दिनमा राज्यस्तरमै नीति तथा कार्यक्रमहरू बनाई यस्ता संस्थाहरूलाई हरेक खालका सहयोग गर्न तयार हुनुपर्ने औल्याएका छन् ।
कार्यक्रममा क्याम्पस प्रमुख डा.राजेन्द्र केसीले शिक्षाले जीवन जीउने कला सिकाउनु पर्ने बताउँदै गणुस्तरीय, जीवनोपयोगी, अन्तर्राष्ट्रिय बजार उपयोगी शिक्षा नै आफूहरूको मुख्य लक्ष्य भएको बताए । प्रदर्शनीले यस क्षेत्रका विभिन्न संघ संस्थाहरूलाई एकै स्थलमा जम्मा गराई आपसी भेटघाट तथा प्रतिभा प्रदर्शन गर्ने अवसर प्रदान गरेको उनले बताए ।
माघ २३ र २४ गरी दुई दिन चलेको उक्त प्रदर्शनीमा साउथवेस्टन स्टेट कलेज, गोल्डनगेट कलेज, ट्रिनिटी कलेजलगायत विभिन्न स्कुल, कलेज तथा संघ संस्थाका ६० वटा स्टल रहेका थिए । यस कार्यक्रममा उर्जाशील, युवा वैज्ञानिकहरूका प्रतिभाहरू ः हेलिकोप्टर, हाइडोलिकक्रेन, भोटिङ मेसिन, सोलारप्लान्ट, इकोसिस्टम, सिएनसि मसिन, थे्रसर मसिन, ब्लाइन्ड गाइडर मसिन, आगलागी नियन्त्रण यन्त्रलगायतका स्थानीय वस्तुबाट निर्मित, प्रविधिमैत्री सामग्रीको प्रदर्शनीका प्रमुख आकर्षकका केन्द्र रहेका थिए । यस कार्यक्रममा रक्तदान, आँखा जाँच कार्यक्रम, निशुल्क स्वास्थ्य परीक्षण र दन्त परीक्षण, व्यारल रोबोट नेपाल र साउथवेस्टन रोबोटिक क्लबको सहकार्यमा रोबोटिक कम्पिटिसन, नेपाल एस्टोनोमिकल सोसाइटी र साउथवेस्टन एस्टोनोमिक र एस्टोफिजिक्स क्लबको सहकार्यमा सोलार अब्जरभेसन कार्यक्रम र विज्ञान परियोजना प्रस्तुतीकरण, साङ्गीतिक कार्यक्रम, प्रहसन जस्ता कार्यक्रमहरू पनि आयोजना गरिएको थियो ।
