काठमाडौं । एभरेष्ट इन्स्योरेन्स कम्पनीको चालु आर्थिक वर्ष २०७६।७७ को दोस्रो त्रैमासको अवधिमा कुल बीमाशुल्क आर्जन २५ प्रतिशतले बढेको छ ।
कम्पनीले चालु आवको दोस्रो त्रैमासको अवधिमा ४८ करोड ६२ लाख ४३ हजार रुपैयाँ कुल बीमा शुल्क आर्जन गर्न सफल भएको छ । कम्पनीले गत आवको सोहि अवधिमा ३८ करोड ९८ लाख ५७ हजार रुपैयाँ कुल बीमाशुल्क आर्जन गरेको थियो ।
कम्पनीले प्रकाशन गरेको वित्तीय विवरण अनुसार कम्पनीले पुस मसान्तसम्ममा ५१ हजार ५ सय ५८ वटा बीमालेख जारी गरेको छ । कम्पनीले गत बर्षको सोहि अवधिमा ४१ हजार २ सय ७६ बीमालेख जारी गरेको थियो ।कम्पनीको खुद बीमाशुल्क आर्जन २२ प्रतिशतले बढेर २३ करोड रुपैयाँ पुगेको छ । कम्पनीले गत बर्षको सोहि अवधिमा १८ करोड ८० लाख रुपैयाँ बराबरको खुद बीमाशुल्क आर्जन गर्न सफल भएको थियो ।
पुस मसान्तसम्ममा कम्पनीले २ हजार ३ सय १४ वटा पोलिसीकोे दाबी बापत ९ करोड २५ लाख ८६ हजार रुपैयाँ दाबी भुक्तानी गरेको छ । त्यस्तै कम्पनीले २ हजार ७ सय ८४ वटा पोलिसीको १ अर्ब १४ करोड रुपैयाँ बीमा दाबी भुक्तानी गर्न बाँकि रहेको छ ।
१ अर्ब ९ करोड रुपैयाँ चुक्ता पूँजी रहेको एभरेष्टको जगेडा कोषमा १६ करोड ९६ लाख २८ हजार रुपैयाँ संचित रहेको छ । कम्पनीको प्रतिशेयर आम्दानी १० रुपैयाँ ३९ पैसा रहेको छ । यस्तै कम्पनी प्रति शेयर नेटवर्थ १ सय ३८ रुपैयाँ ८२ पैसा रहेको छ ।