काठमाडौँ । प्रिमियर इन्स्योरेन्स कम्पनीले आर्थिक वर्ष २०७६/७७ को पहिलो त्रैमासको वित्तीय विवरण प्रकाशित गरेको छ । चालु आवको पहिलो त्रैमासको अवधिमा कम्पनीले ४३ करोड ८ लाख रुपैयाँ कुल बीमा शुल्क आर्जन गरी पाँच करोडभन्दा बढि मुनाफा आर्जन गर्न सफल भएको छ । गत आवको सोही अवधिमा कम्पनीले ४३ करोड २ लाख रुपैयाँ कुल बीमा शुल्क आर्जन गरेको थियो ।
त्यस्तै, प्रथम त्रैमासको अवधिमा कम्पनीले २१ करोड रुपैयाँ खुद बीमा शुल्क आर्जन गरेको छ । गत आवको सोही अवधिमा कम्पनीले २२ करोड ६ लाख रुपैयाँ खुद बीमा शुल्क आर्जन गरेको थियो । गत आवको सोही अवधिको तुलनामा कम्पनीको खुद बीमा शुल्क घटेको देखिन्छ ।
इन्स्योरेन्सले चालू आर्थिक वर्षको पहिलो त्रैमासमा ५ करोड ७८ लाख खुद नाफा गरेको छ । गत आवको सोही अवधिको तुलनामा यो ४० प्रतिशतले बढी हो । गत आर्थिक वर्षको पहिलो त्रैमासमा कम्पनीले ४ करोड १२ लाख रुपैयाँ मात्रै खुद नाफा गरेको थियो ।
इन्स्योरेन्सले असोज मसान्तसम्ममा २४ करोड ९४ लाख रुपैयाँ दाबी भुक्तानी गरेको छ । एक अर्ब ८५ करोड ९७ लाख रुपैयाँ भुक्तानी गर्न बाँकी छ । एक अर्ब ७ करोड ४५ लाख रुपैयाँ चुक्ता पूँजी रहेको कम्पनीको जगेडा कोषमा १९ करोड ८६ लाख रुपैयाँ, बीमा कोषमा ५२ करोड ७५ लाख रुपैयाँ छ ।
कम्पनीले प्रथम त्रैमासको अवधिमा ४९ हजार ४३३ बीमालेख जारी गरेको छ । कम्पनीको प्रति शेयर आम्दानी २१.३५ रुपैयाँ रहेको छ । त्यस्तै, प्रति शेयर नेटवर्थ १७२ रुपैयाँ १२ पैसा रहेको छ ।
