काठमाडौं । हाउजिङ बुकिङ गरी घरदिन्छु भनि रकम लिई उक्त घरजग्गामा आफ्नै घर बनाएर ठगी गरेका रुप ज्योतिले अन्ततः पीडितलाई रकम भुक्तानी गरेका छन् । रकम भुक्तानी गरेपछि ज्योति रिहा हुने भएका छन् । पीडित विजेन्द्रकृष्ण मल्लले बुधबार रकम पाएपछि बिहिवार विहानै मुद्दा फिर्ता लिने भन्दै महागनरीय प्रहरी काठमाडौंमा निवेदन दिएका छन् ।
पूर्व अर्थ राज्यमन्त्रीसमेत रहेका रूप ज्योतिविरुद्ध मल्लले १ करोड २६ लाख रुपैयाँ ठगी भएको भन्दै प्रहरीमा जाहेरी दिएका थिए । हिजो जग्गा वा क्षतिपूर्ति सहितको रकम तिरेको जनाइएको छ । मल्लको जाहेरीपछि गत बिहीबार रूप ज्योति र उनको छोरी सुरुचि ज्योतिलाई प्रहरी पक्राउ गरेको थियो भने पद्मज्योति विरुद्धमा पनि पक्राउ पुर्जी जारी गरेको थियो ।
प्रहरीले मुद्दाको फाइल जिल्ला सरकारी वकिलको कार्यालयमा बुझाइसकेको जनाएको छ । सरकारी वकिलको कार्यालयले अब अदालतमै पीडितको निवेदन पेश गरेर अन्तिम किनारा लगाउने तयारी गरिरहेको छ । ज्योति ग्रुपका रुप ज्योति र उनी छोरी आजै रिहा हुने सम्भावना रहेको बताइएको छ । नेपाल उद्योग बाणिज्य महासंघको काठमाडौं शाखाले ज्योतिको रिहाईको लागि आन्दोलन घोषणा गरिसकेको छ ।
