काठमाडौं । गुराँस लघुवित्त वित्तीय संस्थाको ८ दशमलव ०१ प्रतिशत लाभांश सुरक्षित गर्ने आज कात्तिक २६ गते अन्तिम दिन रहेको छ । संस्थाले मंसिर १४ गते साधारण सभा बोलाएको छ । संस्थाले बुधबार कत्तिक २७ गते बुक क्लोज गर्दैछ । यसर्थ, मंगलबारसम्म कायम सेयरधनीले मात्र कम्पनीले वितरण गर्ने लाभांश सुरक्षित गर्नेछन् ।
सभा न्यू अञ्जुली होटल, धनकुटामा बिहान ११ बजेबाट सुरु हुनेछ । संस्थाले गत आर्थिक वर्षको नाफाबाट ७.६१ प्रतिशत बोनस सेयर र करका लागि ०.४० प्रतिशत नगद वितरण गर्न लागेको हो ।
सभामा कम्पनीले ‘घ’ वर्गका अन्य कुनै वित्तीय संस्थाहरु गाभ्न र गाभिन परेमा त्यसको सम्पूर्ण अख्तियारी सञ्चालक समितिलाई दिने प्रस्ताव पनि हुनेछ । सञ्चालकहरुको भत्ता बढाउने एजेन्डा पनि छ ।
त्यस्तै, सभामा आर्थिक वर्ष २०७५–७६ को वासलात, नाफा–नोक्सान र नगद प्रवाहमाथि छलफल हुनेछ । आर्थिक वर्ष २०७६–७७ को लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा रहेको छ ।
