काठमाडौं । महालक्ष्मी विकास बैंकले यही कात्तिक २९ गते १८ औं वार्षिक साधारणसभा गर्ने भएको छ । साधारणसभामा यसअघि सञ्चालक समितिले प्रस्ताव गरेको १७.८९ प्रतिशत लाभांश दिने प्रस्ताव पेश गरिनेछ भने मर्जरमा जाने प्रस्ताव समेत पेश गरिनेछ ।
बैंकले गत आर्थिक बर्षको नाफा र संचित मुनाफा समेतबाट २८ करोड १४ लाख रुपैयाँ बोनस शेयर दिने प्रस्ताव एजेण्डाको रुपमा साधारणसभामा पेश गर्दैछ । सो क्रममा बोनस शेयरमा लाग्ने कर प्रयोजन सहित ९.८९ प्रतिशत नगद लाभांशको प्रस्ताव साधारणसभामा जाने छ । त्यस्तै बैंकले मर्जरमा जानको लागि सञ्चालक समितिलाई जिम्मा दिने सम्बन्धी प्रस्ताव समेत लैजाने भएको छ । बीग मर्जरमा कुनै बैंक वा वित्तीय संस्थासँग सहमति भएमा मर्जरको बाटो खुलाउन यस्तो प्रस्ताव समेत साधारणसभामा पेश गर्न लागिएको हो ।
त्यस्तै, बैंकले हालको शेयर पूँजी संरचनालाई परिवर्तन गर्ने भएको छ । हालको पूँजी संरचना संस्थापकतर्फको ५३.९८ प्रतिशतलाई ५२.४९ प्रतिशतमा झार्ने र सर्वसाधारण तर्फको ४६.२ प्रतिशतलाई बढाएर ४७.५१ प्रतिशत कायम गर्ने सम्बन्धी विशेष प्रस्ताव साधारणसभामा लैजाने भएको जनाएको छ ।
त्यस्तै बैंकले लाभांशको लागि कात्तिक २० गते बुक क्लोज मिति तय गरेको छ । साधारणसभा प्रयोजनका लागि कात्तिक २० गतेदेखि २९ गतेसम्म बुक क्लज हुने बैंकले जनाएको छ ।
