काठमाडौं । नेपालको पूर्वाधार, बैंकिङ तथा बीमा क्षेत्रमा ठूला लगानी गरेका गैर आवासीय नेपाली संघ यतिबेला नयाँ नेतृत्व चयनका लागि काठमाडौंमा निर्वाचन गर्दैछन् । सो समाचार तयार गर्दासम्म मतदान जारी छ ।
नवौं विश्व सम्मेलनमार्फत नयाँ नेतृत्व समेत चयन हुने हुँदा ढिलाई भएको छ । नयाँ नेतृत्व चयनका लागि तोकिएको निर्वाचन छ घण्टा ढिलो हुँदा विदेशबाट आएका प्रतिनिधिहरुले आक्रोस व्यक्त गरेका छन् । निर्धारित कार्यतालिका ३ बजेदेखि मतदान हुने भनिए पनि साँझ ५ बजेका लागि सारिएको थियो । उल्लेखित समयमा समेत मतदान हुन नसकी राति नौ बजे बल्ल मतदान सुरु भएको छ ।
मतदान ढिलो भएपछि मतदानस्थल ह्यायात रिजेन्सी होटलमै मतदाताहरुले नाराबाजी गरेका थिए । विदेशदेखि आएका प्रतिनिधिहरुले चार चार दिन लगाएर बर्वाद पारेको भन्दै हामी भेडा बाख्रा होइनौं, अध्यक्षलाई भेट्न देऊ भन्दै नाराबाजी गरेका छन् ।
मंगलबारदेखि नवौं अन्तर्राष्ट्रिय सम्मेलन तथा महाधिवेशनबाट केन्द्रीय समिति तथा क्षेत्रीय संयोजकसहित ४२ जना पदाधिकारीको निर्वाचित हुँदैछन् । विश्वभर छरिएर रहेका ८१ मुलुकबाट दुई हजार पाँच सयभन्दा बढि प्रतिनिधिहरु सहभागी सम्मेलनमा नयाँ नेतृत्वको लागि वर्तमान उपाध्यक्ष कुमार पन्त र कुल आचार्य प्रतिस्पर्धामा उत्रिएका छन् ।
नेपालमा एनआरएनहरुको बैंक, बीमा, वित्तीय कम्पनी, हाईड्रोलगायतका पूर्वाधार क्षेत्रमा समेत लगानी रहेको छ ।
