काठमाडौं । माछापुच्छ्रे बैंकले असोज २४ गते वार्षिक साधारण सभा गर्ने भएको छ । बैंकको असोज २ गते बसेको संचालक समितिको बैंठककले साधारण सभाको मिति तय गरेको हो । सभा होटल पोखरा ग्राण्ड पार्दी, कास्कीमा बिहान ११ बजे सुरु हुने कम्पनीले जनाएको छ ।
साधारण सभाका लागि असोज १० देखि असोज २४ गतेसम्म बुक क्लोज हुनेछ । असोज ९ गतेसम्म कायम रहने सेयरधनीले मात्र सभामा भाग लिन र लाभांश हात पार्न सक्नेछन् ।
सभामा गत आर्थिक वर्षको नाफाबाट ५ प्रतिशत बोनस सेयर र ११ प्रतिशत नगद लाभांश वितरण गर्ने प्रस्ताव पेश हुने जनाएको छ ।
यस्तै, अन्य कुनै बैंक तथा वित्तीय संस्थासँग मर्जर वा एक्विजिसन गर्न तथा वैदेशिक रणनीतिक साझेदारीमा जानु परेमा सम्पूर्ण अख्तियारी सञ्चालक समितिलाई दिने प्रस्ताव पनि पेश हुनेछ ।
बोनस वितरणपछि चुक्ता पुँजी बढ्ने भएकाले प्रबन्धपत्र तथा नियमावलीमा संशोधन गर्ने अख्तियारी पनि सञ्चालक समितिलाई दिइने समेत बैंकले जनाएको छ ।
