काठमाडौं । पाँचौं संविधान दिवस भव्य रुपमा मनाउने सरकारको निर्णय पछ्याउँदै बीमा समितिले पनि भव्य र सभ्य रुपमा मनाउने भएको छ । बीमा समितिले संविधान दिवस मनाउने सन्दर्भमा सैनिक मञ्च टुँडिखेलमा आयोजित कार्यक्रममा सहभागीता जनाउने भएको छ । त्यसको लागि सबै बीमा कम्पनीका कर्मचारीहरुलाई समेत उपस्थित हुन आग्रह गरेको छ ।
बीमा समितिले पेशागत अभिकर्ता संघ, बीमक संघ, सर्भेयर संघलगायतका सरोकारवाला निकायहरुसँग समन्वय गरी संविधान दिवसको दिन भव्य रुपमा मनाउन लागेको बीमा समितिका सूचना अधिकारी निर्मल अधिकारीले बताए । बीमा कम्पनीका कर्मचारीहरुले समेत सहभागिता जनाउने उनले बताए । बीमा समितिमा गत भदौं २६ गते भएको प्रमुख कार्यकारी अधिकृतहरुसँगको छलफलमा बीमा कम्पनीका माथिल्लो तहका उच्च अधिकारीहरु सहभागी हुने सहमति भएको थियो ।
संविधान दिवस मनाउन असोज ३ गते विहान ७ः३० मा भद्रकालीमा उपस्थित हुन सबै बीमा कम्पनीका कर्मचारीहरुलाई निर्देशन दिइएको छ । संविधान दिवसको पूर्वसन्ध्यामा बिहिवार कर्मचारी युनियनले रक्तदान कार्यक्रम आयोजना गर्दैछन् । विहान ८ः०० बजेदेखि सुरु हुने रक्तदान कार्यक्रम ११ बजेसम्म चल्नेछ ।
यसैबीच, संविधान दिवसको अवसरमा शहिद परिवारको दुर्घटना बीमामा छुट दिने सम्बन्धी बीमाको प्याकेज तयार हुँदैछ । सम्भवतः ३ गते नै सो प्याकेजको घोषणा हुनेछ ।
