काठमाडौं । एनसीसी बैंकको बीसौं र एक्काइसौं वार्षिक साधारण सभा एकै दिन भोली सोमबार हुने भएको छ । सधारण सभा राष्ट्रिय सभा गृहमा बस्ने भएको छ । सभा बिहान ११ बजे सुरु हुने जनाएको छ ।
साधारण सभामा आर्थिक वर्ष २०७४/७५ को नाफाबाट सेयरधनीलाई १५ दशमलव ८९ प्रतिशत बोनस सेयर वितरण गर्ने प्रस्ताव पेश हुनेछ । बैंकले हाल कायम चुक्ता पुँजी ७ अर्ब १ करोड ८५ लाख रुपैयाँको १ अर्ब ११ करोड ५२ लाख ५३ हजार ५२२ रुपैयाँ बोनस सेयर दिन लागेको हो ।
साधारण सभाले बैंक सञ्चालक समितिको निर्वाचन पनि गर्नेछ । सहायक कम्पनी खडा गरेर ब्रोकरको काम गर्ने, एफपीओ ल्याउन तथा धितोपत्र निक्षेप लगायतका काम गर्न बैंकको प्रबन्धपत्र तथा नियमावली संशोधन गर्ने एजेन्डा पनि छ ।
प्रबन्धपत्र तथा नियमावली संशोधन भएपछि बैंकलाई एफपीओ जारी गर्न, सहायक कम्पनीमार्फत ब्रोकर सेवा उपलब्ध गराउन तथा धितोपत्र निक्षेपको काम गर्न समेत बाटो खुला हुनेछ ।
एफपीओ जारी गरी प्राप्त प्रिमियमलाई सेयर प्रिमियम शीर्षक अन्तर्गत जगेडाको रुपमा लेखांकन गर्ने प्रावधान पनि प्रबन्धपत्र तथा नियमावलीमा समेट्ने भएको छ ।
उपयुक्त बैंक–वित्तीय संस्थासँग मर्जर तथा एक्विजिसन गर्न एवं वैदेशिक रणनीतिक साझेदारी भित्र्याउन सञ्चालक समितिलाई अख्तियारी दिने प्रस्ताव पनि पेश हुनेछ । सभा प्रयोजनका लागि बैंकले साउन २६ गते बुक क्लोज गरेको छ । साउन २३ गतेसम्म कायम सेयरधनीले साधारण सभामा भाग लिन तथा लाभांश पाउनेछन् ।
बोनस पछि पुँजी ८ अर्ब १३ करोड ३८ लाख रुपैयाँ पुग्नेछ ।
