काठमाडौँ । गत शनिबार एटिएम सिष्टम ह्याक गरी करोडौं रुपैयाँ लुट्न चिनियाँ ह्याकरहरु सफल भएपछि त्यसको आतंक अझै हटेको छैन । साईबर सेक्युरिटीमाथि गम्भिर प्रश्न चिन्ह उठेपछि नेपाल राष्ट्र बैंकले एटिएमबाट दैनिक ६० हजार रुपैयाँभन्दा बढि रकम निकाल्न नमिल्ने गरी सीमा बाँधेको छ ।
केन्द्रीय बैंकले बिहिबार एक निर्देशन जारी गर्दै एटीएम मेसिनबाट निकाल्न मिल्ने रकमको सिमा घटाएको हो । चिनियाँ ह्याकरले एटिएम नेटवर्कको गेटवे स्वीचिङमा ह्याक गरी एटीएम मेशिनबाट प्रयोगकर्ताको विवरण बिना नै रकम िनिकालेका थिए । करोडौं रुपैयाँ रकम चोरेपछि राष्ट्र बैंकले एटिएमबाट निकाल्न मिल्ने रकमको सीमा घटाएको हो ।
अब एटीएमबाट एक दिनमा ६० हजार रुपैयाँ र एक पटकमा न्यूनतम पाँच सयदेखि अधिकतम २० हजार रुपैयाँमात्रै निकाल्न सकिने राष्ट्र बैंकद्धारा जारी निर्देशनमा उल्लेख छ । यसअघि एक दिनमा एक लाख रुपैयाँ र एक पटकमा २५ हजार रुपैयाँसम्म निकाल्न सकिने व्यवस्था रहेको थियो ।
एटिएम ह्याकपछि सर्वसधारण त आतंकित त थिए नै केन्द्रीय बैंकले समेत जोखिम मोल्न नचाहेर सीमा घटाएको हो ।
बैंक तथा वित्तीय संस्थाहरुले नगद व्यवस्थापन, भौगोलिक व्यवस्था र विशेष परिस्थिति समेतलाई ध्यानमा राखी तोकिएको रकमको सीमा घटाउने व्यवस्थालाई बाधा पुर्याएको नमानिने केन्द्रिय बैंकद्धारा जारी निर्देशनमा उल्लेख छ । 
