काठमाडौं । बीमा समितिभित्रै सञ्चालन हुँदै आएको बीमा तालिम केन्द्र (इन्स्योरेन्स इन्टिच्युट) मा हालसम्म छ सय ५८ जनाले बीमा सम्बन्धी तालिम लिएका छन् ।
इन्स्योरेन्स इन्टिच्यूट नेपाल लि. संस्थाले सञ्चालन गरेको तालिममा हालसम्म ६५८ जनाले अण्डरराईटिङ, सुशासन, बजारिकरण, कृषि बीमा तथा सम्पत्ति शुद्धिकरण जस्ता विषयमा तालिम लिएको बीमा समितिले जनाएको छ ।असार मसान्तसम्ममा विभिन्न इन्स्योरेन्स कम्पनी, बैंकका कर्मचारीहरु तालिममा सहभागी भएको इन्स्योरेन्स इन्टिच्युटका प्रमुख कार्यकारी अधिकृत एवम् बीमा समितिका बीमाविज्ञ भोजराज शर्माले बताए ।
केन्द्रका अनुसार हालसम्म २४ वटा कार्यक्रम संचालन भइसकेका छन् भने केही कार्यक्रम जारी छ । हाल जीवन बीमा, निर्जिवन बीमा कम्पनी र बैंकहरुहरुबाट समुह समुह बनाएर आवश्यकता अनुसार तालिम दिने गरिएको छ ।
नेपालको बीमा क्षेत्रमा नयाँ कम्पनीहरु सञ्चालनमा आएपछि बीमा क्षेत्रमा दक्ष जनशक्तिको अभाव चुलिएको हो । यही समस्यालाई सम्बोधन गर्न समितिले तालिम केन्द्रको स्थापना गरेको हो । बीमा समिति तथा कम्पनीहरुको पनि लगानी रहेको छ । सुरुका दिनमा बीमा समितिका ४६ जना कर्मचारी तालिममा सहभागी भएका थिए ।
