काठमाडौं । प्रभु समुहद्वारा प्रवद्र्धित प्रभु लाईफ इन्स्योरेन्स कम्पनीमा आजदेखि नयाँ सिईओको रुपमा नारायण प्रसाद पौडेलले कार्यभार सम्हालेका छन् । नेपाल बैंकको कार्यकारी निर्देशक पदबाट अनिवार्य अवकास लिएका पौडेललाई गत जेठ अन्तिम गते बसेको सञ्चालक समितिको बैठकले प्रमुख कार्यकारीमा नियुक्त गर्ने निर्णय गरेको थियो । आज अर्थात साउन १ गतेदेखि लागू हुने गरी नियुक्त लिएका पौडेलले आज औपचारिक कार्यक्रमका बीच कार्यभार सम्हालेका हुन् ।
कार्यभार सम्हालेपछि इन्स्योरेन्स खवरडटकमसँग कुरा गर्दै सिईओ पौडेलले संस्थागत उद्देश्य हासिल गर्न मेहनत साथ काम गर्ने बताएका छन् । उनले भने, ‘नयाँ आर्थिक वर्ष अनुसारको नयाँ बजेट पनि बनाउनुपर्ने भएकोले काम सुरु गर्दैछु । बिल्कुलै नयाँ छु, संस्थागत उद्देश्य प्राप्तिका लागि काम गर्नेछु ।’ जेठको अन्तिम साता नै नियुक्त भएपनि बीमा समितिमार्फत प्रक्रिया पूरा गर्नुपर्ने भएकाले केही ढिलाई भएको हो । केन्द्रीय बैंकका उच्च अधिकारीलाई अन्य बैंक तथा वित्तिय संस्थामा जागिर खान छ महिनाको कुलिङ पिरियड हुने भएपनि बीमा कम्पनीमा प्रवेशका लागि भने त्यस्तो बाध्यकारी नियम छैन ।
