इन्फिनिटी लघुवित्त वित्तीय संस्थाले जेठ १३ गतेदेखि ६ लाख ४० हजार ३ सय कित्ता आइपीओ बिक्री गर्ने भएको छ । जसमध्ये १० हजार ३ सय ७० कित्ता सेयर कर्मचारीलाई छुट्याइएको छ भने बाँकी ६ लाख २९ हजार ९ सय ३० कित्ता सर्वसाधारणले आवेदन दिन सक्नेछन् ।
लघुवित्तले कुल ६ लाख ७४ हजार कित्ता सेयरमध्ये ३३ हजार ७ सय कित्ता म्युचुअल फन्डहरुलाई बाँडफाँट गरी बाँकी रहेको सेयर कर्मचारी र सर्वसाधारणलाई बिक्री गर्न लागेको हो ।
लगानीकर्ताले प्रतिकित्ता १ सय रुपैयाँका दरले न्यूनतम १० कित्तादेखि अधिकतम ३ हजार ३ सय ७० कित्ताका लागि आवेदन दिन पाउनेछन् । तर लघुवित्तको आइपीओमा लगानीकर्ताको आकर्षण अधिक भएकाले १० कित्ता मात्र आवेदन दिए पनि पुग्ने देखिन्छ । आइपीओ निष्काशन तथा विक्री प्रबन्धमा सिभिल क्यापिटल मार्केट रहेको छ ।
आइपीओ जेठ १६ गतेसम्म भर्न सकिनेछ भने ढिलोमा असार १० गतेसम्म भर्न सकिनेछ । आइपीओले औसतभन्दा तल जनाउने ‘इक्रा एनपी ग्रेड ४’ रेटिङ पाएको छ । यसमा सी–आस्वा सदस्य बैंक तथा वित्तीय संस्थाबाट आवेदन दिन सकिन्छ ।
