जीवन बीमा कम्पनीहरुले बीमालेख धितोमा राखी २७ अर्ब ९९ करोड रुपैयाँ कर्जा प्रवाह गरेका छन् । कम्पनीहरुले प्रकाशित गरेको चालु आर्थिक बर्ष २०७५/७६ को तेस्रो त्रैमासको वित्तीय विवरण अनुसार कम्पनीहरुले उक्त रकम बराबर बीमालेख धितो कर्जा प्रवाह गरेको देखिएको छ ।
जीवन बीमा कम्पनीहरुमध्ये नेपाल लाईफ इन्स्योरेन्स, लाईफ इन्स्योरेन्स कर्पोरेशन र नेशनल लाईफ इन्स्योरेन्स कम्पनीले सबैभन्दा धेरै कर्जा प्रवाह गरेका छन् ।
नेपाल लाईफ इन्स्योरेन्स कम्पनीले कम्पनीले चालु आर्थिक वर्षकोे चैत महिनासम्ममा ११ अर्ब २ करोड ८२ लाख ४२ हजार ६ सय ५६ रुपैयाँ बीमा लेख धितो कर्जा प्रवाह गरेको छ । त्यसैगरी लाईफ इन्स्योरेन्स कर्पोरेशनले ८ अर्ब ६२ करोड ८९ लाख ८ हजार १ सय ११ रुपैयाँ र नेशनल लाईफ इन्स्योरेन्सले ३ अर्ब २८ करोड २७ लाख ९७ हजार ९ सय १३ रुपैयाँ धितो कर्जा प्रवाह गरेको तथ्यांकले देखाएको छ ।
त्यसैगरी, राष्ट्रिय बीमा संस्थानले १ अर्ब ३५ करोड ९४ लाख ८८ हजार ४ सय ८२ रुपैंया बीमालेख धितोकर्जा प्रवाह गरेको तथ्यांकले देखाएको छ । एशियन लाईफ इन्स्योरेन्स कम्पनीले १ अर्ब २० करोड १६ लाख ८ हजार ९ सक्ष् १ रुपैयाँ, मेट लाईफ इन्स्योरेन्सले ८९ करोड २१ लाख ४४ हजार रुपैयाँ, प्राइम लाईफले ७९ करोड २३ लाख ९१ हजार, सूर्या लाईफ इन्स्योेरेन्सले ३४ करोड १२ लाख ७३ हजार रुपैयाँ र गुराँस लाईफ इन्स्योरेन्सले २९ करोड ५१ लाख ३९ हजार ४ सय ९४ रुपैयाँको बीमालेख धितो कर्जा प्रवाह गरेको छन् । 
५ नयाँ जीवन बीमा कम्पनीले गरे १७ करोड ४० लाख बीमालेख धितोकर्जा प्रवाह
१० नयाँ जीवन बीमा कम्पनीहरुमध्ये नयाँ ५ जीवन बीमा कम्पनीहरुले बीमालेख धितोमा कर्जा प्रवाह गरेका छन् । नयाँ जीवन बीमा कम्पनीहरुमध्ये युनियन लाईफ र सन नेपाल लाईफ इन्स्यारेन्स कम्पनीले सबैभन्दा धेरै बीमालेख कर्जा प्रवाह गरेका छन् ।
यूनियन लाईफ इन्स्योरेन्स कम्पनीले चालु आर्थिक वर्षको चैत महिनासम्ममा ८ करोड ३३ लाख ३ हजार ९ सय ९ रुपैयाँ बीमालेख धितो कर्जा प्रवाह गरेको छ । त्यसैगरी सन नेपाल लाइफ इन्स्योरेन्सले ४ करोड ११ लाख ९६ हजार रुपैयाँ बीमालेख धितो कर्जा प्रवाह गरेको छ ।
त्यसैगरी आइएमई लाईफ इन्स्यारेन्सले २ करोड ६९ लाख १२ हजार सिटिजन लाईफ इन्स्यारेन्सले २ करोड १९ लाख ७८ हजार रुपैयाँ र ज्योति लाईफ इन्स्यारेन्सले ६ लाख ७९ हजार रुपैयाँ बीमालेख धितोकर्जा प्रवाह गरेका छन् ।
