नेपाली बीमा कम्पनीसँग काम गर्न १७ विदेशी बीमांकी इच्छुक, एक जना नेपाली बीमांकीले पनि दिईन आवेदन

1096

नेपाली बीमा कम्पनीसँग काम गर्न विभिन्न मुलुकका १७ बीमांकी इच्छुक देखिएका छन् । बीमा समितिले निर्माण गरेको बीमांकी रोष्टरमा उनीहरुले नेपाली बीमा कम्पनीको बीमांकी मूल्यांकन गर्ने रुचीका साथ आवेदन दिएका छन् । बीमा समितिका अनुसार बैशाख १२ गतेसम्ममा अमेरिका, बेलायत, भारत लगायतका मुलुकका बीमांकी सोसाईटीबाट लाईसेन्स प्राप्त गरेका बीमांकी आवेदन दिएका हुन् ।

आवेदन दिएकामध्ये अमेरिकन बीमाकीं सोसाईटीबाट बीमांकी लाईसेन्स पाएका तीन जनाले आवेदन दिएका छन् । त्यस्तै, बेलायतबाट लाईसेन्स लिएका तीन जनाले आवेदन दिएका छन् । १० जनाले भारतीय बीमांकी सोसाईटीबाट लाईसेन्स लिएकाले आवेदन दिएका छन् । आवेदन दिएकामध्ये एक जना नेपाली बीमांकी प्रेक्षा माथेमाले पनि आवेदन दिएको बीमा समितिले बताएको छ ।

त्यस्तै जीवन बीमा कम्पनीका लागी १४ बीमांकीले आवेदन दिएका छन् भने निर्जीवन बीमाको लागि १२ जनाले आवेदन दिएका छन् ।

आवेदन दिएका बीमांकीको अध्ययन पछि बीमा समितिले स्वीकृति दिने समितिका निर्देशक कमल रेग्मीले बताए । स्वीकृति दिएका बीमांकीसँग नेपाली बीमा कम्पनीले आफनो वित्तिय विवरणको बीमांकी मूल्यांकन गराउँन सक्नेछन् ।

बीमा समितिले गत फागुनमा नै सुचना जारी बीमांकी रोष्टर निर्माण गर्ने जानकारी दिएको थियो । इच्छुक बीमांकीलाई आवेदनको लागि आह्वान गरेको थियो । पहिलो सुचनामा पर्याप्त आवेदन नपरेपछि समितिले गत चैत्र १३ गते दोस्रो सुचना जारी गरी आवेदन दिनका लागि आह्वान गरेको थियो । नेपाली बीमा कम्पनीहरुले भोग्दै आएको बीमाकीको समस्या समाधान गर्न बीमा समितिले बीमांकी रोष्टर निर्माण गर्न लागेको हो ।

यसमा तपाइको मत

कृपया आफ्नो प्रतिक्रिया दिनु होला ।
कृपया आफ्नो नाम यहाँ लेख्नु होस्