बीमा कम्पनीमा भएका क्रस होल्डिङ्गको अध्ययन गर्दै समिति


नेपालमा सञ्चालित बीमा कम्पनीहरुमा भएको क्रस होल्डिङ्गको बीमा समितिले अध्ययन गर्ने भएको छ । केही कम्पनीहरुमा एउटै व्यक्ति र समूहको लगानी देखिए पछि समितिले क्रस होल्डिङ्गको अध्ययन गर्न लागेको हो ।

बिमा समितिले जारी गरेको संस्थागत सुशासनका अनुसार कुनै पनि बिमा कम्पनीमा एकाघरका परिवारको १५ प्रतिशत भन्दा बढी लगानी हुनुहुँदैन । त्यस्तै, एउटा कम्पनीमा १५ प्रतिशत हिस्सा भएको व्यक्तिको अर्को कम्पनीमा १ प्रतिशत भन्दा बढी लगानी हुनुहुँदैन । त्यसैगरी एउटै समूहले एकै खालको एक भन्दा बढी कम्पनीमा लगानी गर्न पाउँदैन ।

जस्तै, एउटा जीवन बीमा कम्पनीमा लगानी गरेको समूहले अर्को जीवन बीमा कम्पनीमा १ प्रतिशत पनि लगानी गर्न पाउँदैन । त्यसैगरी एउटा निर्जीवन बीमा कम्पनीमा लगानी गरेको समूहले अर्को निर्जीवन बीमा कम्पनीमा लगानी गर्न पाउँदैन ।

तर, आईएमई समूह, विशाल समूह लगायतका केही समूहको एक भन्दा बढी कम्पनीमा लगानी भएको पाईएको समितिले बताएको छ । जस्तै आईएमई जीवन बीमा कम्पनीमा आईएमई समूहको ठूलो हिस्सा छ । त्यसैगरी सोही समूहको रिलायवल जीवन बीमा कम्पनीमा पनि लगानी रहेको छ ।

साथै आईएमई जनरल इन्स्योरेन्स कम्पनीमा पनि उक्त समूहको लगानी छ । साथै नेपाल इन्स्योरेन्समा उक्त समूहको लगानी छ । साथै ज्योति जीवन बीमा कम्पनीमा ठूलो हिस्सा रहेको विशाल समूहको नेपाल पुर्नबिमा कम्पनीमा पनि लगानी छ ।

बीमा समितिको निर्देशन अनुसार एउटा कम्पनी भन्दा बढी कम्पनीमा लगानी गर्न नपाईने भए पनि केही समूहको नियमविपरित लगानी गरिरहेका छन् । त्यसैले समितिले यस्ता कम्पनीको अध्ययन गर्ने योजना बनाएको छ ।

प्रतिक्रिया दिनुहोस्

सम्बन्धित समाचार