प्रदेश २ सरकारले नवजात शिशुको जीवन बीमा गरिदिने भएको छ । २ नम्बर प्रदेशले आठ जिल्लाका एक एक गाउँपालिका, नगरपालिका, उप–महानगरपालिका, महानगरपालिका गरी आठ वटा स्थानीय तहको सबै वडाका हरेक शिशुलाई जन्मिने वित्तिकै बीमा गरिदिन थालेको हो ।
तराईमा भ्रूण हत्या अन्त्य गर्न माघ १ गतेदेखि जन्मिएका शिशुको जीवन बीमा शुरु गरेको स्रोतले जनाएको छ । मुख्यमन्त्री मोहम्मद लालबाबु राउतले ‘बेटी बचाउ, बेटी पढाउ’ नीति तथा कार्यक्रम अन्तर्गत प्रदेश २ को आठ जिल्ला सप्तरी, सिराहा, धनुषा, महोत्तरी, सर्लाही, बारा, रौतहट र पर्साको आठ स्थानीय तहका सबै वडामा जन्मिने नवजात शिशुको नाममा जीवन बीमा गरिदिन थालेको बताए । ‘यहाँ बेटीले जन्मिनै पाउँदैनन्, कैयौँंको गर्भमै हत्या हुन्छ’, मुख्यमन्त्रीले भने, ‘यसलाई रोक्न हामीले शिशुको जीवन बीमा थालनी गरेका हौँ ।’
मुख्यमन्त्री राउतका अनुसार प्रदेश २ सरकारले घोषणा गरेको ’बेटी बचाउ, बेटी पढाउ’ नीति तथा कार्यक्रम कार्यान्वयन गर्दै पहिलो चरणमा माघ १ गते देखि जन्मिने हरेक शिशुको नाममा एक लाख २५ हजार रुपैयाँ बराबरको बीमा गरिदिन थालेको छ ।
बजेट तर्जुमा गरी चरणबद्ध रूपमा आठवटै जिल्लाको सबै स्थानीय तहको वडा तह, घरसम्म विस्तार गर्ने लक्ष्य रहेको मुख्यमन्त्री राउतले जानकारी दिएका छन् ।
