जीवन बिमा कम्पनीहरुले बैदेशिक रोजगार म्यादी जीवन बीमा पुलबाट सञ्चालन गर्ने भएका छन् । बिमा समितिले माघ १ गते देखि लागू हुने गरी कम्पनीहरुलाई बैदेशिक रोजगार बिमा पुलबाट जारी गर्न निर्देशन दिएको छ ।
समितिले माघ १५ गते भित्रमा सबै जीवन बीमा कम्पनीले मिलेर बैदेशिक रोजगार बीमा बारे कार्यविधि प्रस्तुत गर्न समेत निर्देशन दिएको छ । तत्कालका लागी भने बीमा कम्पनीहरुले हालकै अवस्थामा बीमालेख जारी गर्न पाउँनेछन् । तर, उक्त व्यवसाय पुलमा संकलन हुनेछ । बर्षको अन्तिममा कम्पनीहरुको बजार हिस्सा अनुसार व्यवसाय बाँडफाँड हुने समितिले बताएको छ ।
समितिले पछिल्लो ६ महिनामा तयार पारेको तथ्यांक अनुसार हाल १८ वटा जीवन बिमा कम्पनीहरुले बैदेशिक रोजगार म्यादी जीवन बिमा जारी गरी रहेका छन् । जसअनुसार नेशनल लाईफ इन्स्योरेन्सको कम्पनीको हिस्सा सबैभन्दा अधिक १९ प्रतिशत रहेको छ । दोस्रोमा प्राईम लाईफ इन्स्योरेन्सको १५ प्रतिशत रहेको छ । सूर्या लाईफ इन्स्योरेन्सको १२ प्रतिशत, युनियन लाईफ र नेपाल लाईफको ११ प्रतिशत हिस्सा रहेको छ । रिलायवल र रिलायन्स लाईफ इन्स्योरेन्स कम्पनीको ८/८ प्रतिशत हिस्सा रहेको छ ।
तर, आगामी चार बर्ष पछि बैदेशिक रोजगार (म्यादी) जीवन बिमामा सबै कम्पनीको हिस्सा बराबर बनाईने भएको छ । हाल कम्पनीहरुको बजार हिस्सा अनुसार व्यवसाय बाडफाँड गरे पनि चार बर्ष पछि भने समान बनाइने समितिले बताएको छ । आगामी आर्थिक बर्ष देखि समितिको रोहबरमा कम्पनीहरुको व्यवसाय हिस्सा तय गरिनेछ ।
बैदेशिक रोजगार बीमा अनियमितता देखिएपछि यसलाई मर्यादित बनाउँन समितिले पुल गठन गरेको हो । यसअघि समितिले लघुबिमा पुल मार्फत जारी गर्दै आएको छ ।
