बीमा कम्पनीहरुले बिदेशमा पनि शाखा सञ्चालन गर्न पाउने

अब देखि बीमा कम्पनीहरुले बिदेशमा पनि शाखा सञ्चालन गर्न पाउँने भएका छन् । बीमा समितिले जारी गर्न लागेको शाखा स्थापना सम्बन्धि निर्देशिका २०७५ मा गरिएको व्यवस्था अनुसार कम्पनीहरुले बिदेशमा पनि शाखा सञ्चालन गर्न पाउँने भएका छन् ।

कम्पनीहरुले विदेशमा शाखा सञ्चालन गर्नको लागी भने बीमा समितिमा आवेदन दिनुपर्नेछ । त्यसैगरी सम्बन्धित मुलुकको ऐन अनुसार निर्धारित पूँजी समेत कायम गर्नुपर्ने निर्देशिकामा व्यवस्था गरिएको छ । निर्देशिका अनुसार बीमा समितिले तोकेको चुक्ता पूँजी कायम गरेको कुनै पनि कम्पनीले विदेशमा शाखा कार्यालय स्थापना गर्न सक्नेछन् । यसका लागी कम्पनीले सम्बन्धित स्थानकोे सम्भाव्यताको अध्ययन गरी समितिमा बुझाउँनुपर्नेछ । शाखा कार्यालय खोलिने मुलुकबाट लाभांश मुनाफाको रुपमा विदेशी मुद्रामा नेपाल भित्राउन तथा कार्यालय बन्द गर्नुपर्ने अवस्थामा आएमा तोकिएको पूँजी परिवर्तिय विदेशी मुद्रामा अनिवार्य रुपमा स्वदेशमा फिर्ता गर्नुपर्नेछ । त्यसैले सो बिषयमा सम्बन्धित मुलुकको ऐन तथा नीतिगत व्यवस्थाले नरोक्ने व्यहोरा पहिलो नै प्रमाणित गर्नुपर्नेछ । स्वीकृति प्राप्त गरेको ६ महिना भित्रमा शाखा कार्यलय खोलि सक्नुपर्नेछ ।

निर्देशिकाले बीमा कम्पनीहरुलाई गाउँपालिकामा जान प्रेरित गरेको छ । शाखा स्थपना गर्नु अघि समितिको स्वीकृति लिनुपर्नेछ । तर, गाउँपालिकामा स्थापना गर्ने हो भने स्वीकृति लिनु नपर्ने व्यवस्था गरेको छ । काठमाण्डौ उपत्यका भित्र पनि चक्रपथ बाहिर शाखा सञ्चालन गर्नेलाई प्राथमिकता दिईने निर्देशिकामा व्यवस्था गरिएको छ । निर्देशिका अनुसार काठमाण्डौ उपत्यका बाहिर तीनवटा शाखा खोली सञ्चालनमा ल्याए पश्चात मात्र काठमाडौ उपत्यकाभित्र एक शाखा खोल्न स्वीकृति प्रदान गरिने व्यवस्था गरिएको छ ।

निर्देशिकाले बीमकले क्षेत्रीय कार्यालय पनि स्थापना गर्न सक्ने व्यवस्था पनि गरेको छ । एउटा क्षेत्रिय कार्यालय अन्र्तगत १० वटा शाखा कार्यालयहरु रहने व्यवस्था गर्नुपर्नेछ । सोमध्ये ३० प्रतिशत शाखा कार्यलयहरु ग्रामिण स्थानमा सञ्चालनमा रहेको हुनुपर्नेछ । एकै जिल्ला, प्रदेश र क्षेत्रभित्रका शाखा कार्यलयहरुलाई एउटै क्षेत्रिय कार्यालयको मातहतमा राख्नुपर्नेछ । त्यस्तै, एक्सटेन्सन काउण्टर र घुम्ती सेवा पनि सञ्चालन गर्न सकिनेछ ।

प्रतिक्रिया दिनुहोस्

सम्बन्धित समाचार