नेपालमै पहिलो पटक साइबर जोखिमको जोखिम न्युनिकरण गर्ने ‘साइबर क्राइम इन्स्योरेन्स पोलिसी’ सुरु भएको छ । नेपालकै पहिलो बीमा कम्पनी नेपाल इन्स्योरेन्सले नेपालमा पहिलो पटक ‘साइबर क्राइम इन्स्योरेन्स पोलिसी’ को सुरुवात गरेको हो। सो साइबर क्राइमसम्बन्धी बीमा पोलिसी स्वीकृत गरेको बीमा समितिले जनाएको छ ।
केहि समय अगाडी एनआईसी एसिया बैंकको स्वीफ्ट ह्याक प्रकरणपछि बैंक तथा वित्तिय संस्थाहरु उच्च साइबर जोखिममा देखिएका थिए भने, बीमा कम्पनीहरुले त्यसको बीमा गर्ने योजना बनाएका थिए ।
नेपाल इन्स्योरेन्स कम्पनीका प्रमुख कार्यकारी अधिकृत बिजय बहादुर शाहले साइबर क्राइम सम्बन्धी बीमा पोलिसी नियामक निकाय बीमा समितिबाट स्वीकृति पाएको जानकारी दिए । अहिले बिभिन्न बैंक तथा वित्तिय संस्थाहरुसँग त्यसबारे छलफल गरिरहेको शाहले जानकारी दिए। अहिले सम्म नेपालका बैंक तथा वित्तिय संस्थाहरुले ‘साइबर क्राइम इन्स्योरेन्स पोलिसी’ लिएका छैनन् ।
साइबर क्राइम जोखिमको बीमा गर्न भारतीय कम्पनीहरुले नेपाली बैंकहरुलाई प्रस्ताव गरेको तर नेपालको बीमा नीतिसँग मेल नखाएपछि भारतीय बीमा कम्पनीहरुको प्रस्ताव बैंकहरुले स्वीकार गर्न सकेका थिएनन । अब नेपाल इन्स्योरेन्सले नेपालमा पहिलो पटक सुरु गरेको ‘साइबर क्राइम इन्स्योरेन्स पोलिसी’ बाट नेपाली बैंक तथा वित्तिय संस्थाहरुले जोखिम कम गर्न सक्ने देखिन्छ ।
