काठमाडौ । निर्जीवन बीमा कम्पनीहरुले जारी गरेको लघुबीमामा २५ प्रतिशत जनजाती समेटिएका छन् । कम्पनीहरुले गत आर्थिक बर्ष २०७४/७५ मा कम्पनीहरुले जारी गरेको कुल लघुबीमामा सबैभन्दा बढी जनजातीको सहभागीता देखिएको हो ।
तथ्यांक अनुसार कुल बीमितमध्ये १ हजार ३४७ जनजाती रहेका छन् । त्यसैगरी ८७९ जना दलित छन् । दलितको लघुबीमामा सहभागी हुनेमा दोस्रोमा परेका छन् । त्यस्तै क्षेत्री समुदायको संख्या ८०७ छ । ४४७ ब्राम्हण भने भने ४५० मधेशी छन् । साथै ३८६ तमांगको संख्या रहेको छ भने २४४ मगर रहेका छन् ।
तथ्यांक अनुसार थकालीको संख्या धेरै कम देखिएको छ । गत आर्थिक वर्षमा ८ जना थकालीले मात्रै लघुबीमा योजना खरिद गरेका छन् । थकालीको संख्या कम भएकै कारण पनि लघुबीमा सहभागी हुनेको संख्या पनि कम देखिएको हो । राई ३२ जना छन् भने लिम्बु ५२ जनामा लघुबीमा सहभागी भएका छन् ।
६६ करोड लघुबीमा
गत आर्थिक वर्षमा कम्पनीहरुले ६६ करोड १८ लाख रुपैयाँ बराबरको लघुबीमा गरेका छन् । उक्त बीमा बापत कम्पनीहरुले २७ लाख ११ हजार रुपैयाँ बीमाशुल्क संकलन गरेका छन् । कम्पनीहरुले ५ हजार २६२ बीमालेख जारी गरेका छन् । न्यून आय भएका व्यक्तिलाई लक्षित गरी बीमा समितिले लघुबीमा योजना संचालन ल्याएको हो ।
आर्थिक वर्ष २०७२/७३ को बजेट भाषण मार्फत सरकारले कम्पनीहरुलाई आफनो कुल व्यवसायको कुल ५ प्रतिशत लघुबीमा जारी गर्न निर्देशन दिएको थियो । तर, लघुबीमा जारी गर्दा सञ्चालन खर्च अधिक हुने भएपछि कम्पनीहरुले लघुबीमा पुल खडा गरी बिमा जारी गर्दै आएका छन्, गत आवको साउनमा पुल स्थापना गरिएको हो ।
आर्थिक वर्ष २०७५/७६ को बजेट भाषण मार्फत भने सरकारले आगामी दुई बर्ष भित्र कम्पनीहरुले आफनो कुल व्यवसायको १० प्रतिशत लघुबीमा जारी गर्न दिएको छ । त्यस्तै, अर्थमन्त्रालयले संसदमा प्रस्ताव गरेका बीमा बिद्येयकमा पनि लघुबीमा जारी गर्न लघुबीमा कम्पनी खोल्न सकिने व्यवस्था गरिएको छ ।
