काठमाडौं । विश्वको सबैभन्दा ठूलो सामाजिक सञ्जाल कम्पनी फेसबुकको पेरेन्ट मेटा प्लेटफर्मले हप्ताको अन्तिम दिन आफ्नो नाममा नयाँ कीर्तिमान बनाएको छ।
कम्पनीको शेयरभाउ एकैदिन २० प्रतिशतभन्दा बढी बढ्यो र यसको बजार पुँजीकरण २०५ अर्ब डलरको उछाल आएको हो। यो एकै दिनमा कुनै पनि कम्पनीको बजार पुँजीकरणमा भएको सबैभन्दा ठूलो वृद्धि हो। यो विश्वकै धनीव्यक्ति एलन मस्कको कुल सम्पत्तिबराबर हो। ब्लुमबर्ग बिलियनेर्स इन्डेक्सका अनुसार मस्कको कुल सम्पत्ति २०५ अर्ब डलर छ।
यसअघि एकैदिनमा सबैभन्दा धेरै कमाउने रेकर्ड एप्पलको नाममा थियो। सन् २०२२ नोभेम्बर १० मा एप्पलको बजार पुँजीकरण १९१ अर्ब डलरले बढेको थियो। चाखलाग्दो कुरा के छ भने एक दिनमा सबैभन्दा बढी बजार पुँजी गुमाउने कीर्तिमान पनि मेटाको नाममा छ। यसरी एकैदिनमा सबैभन्दा बढी आम्दानी र घाटा दुवैको कीर्तिमान अहिले मेटाको नाममा छ।
अमेरिकाका शीर्ष ७ कम्पनीको बजार पुँजी कुल ३ ट्रिलियन डलरले बढेको छ। यिनीहरुलाई म्याग्निफिसेन्ट ७ भनिन्छ। यसमा टेस्ला, मेटा, अल्फाबेट, अमेजन, एप्पल, माइक्रोसफ्ट र एनभिडिया समावेश छन्। तिनीहरुको मार्केट पुँजीकरण अक्टोबर २०२३ को न्यूनभन्दा ५ ट्रिलियन डलरले बढेको छ। उनीहरुको कुल बजार पुँजीकरण जापान, क्यानडा र बेलायतको शेयर बजारको संयुक्त बजार पुँजीकरणबराबर भएको छ। साथै, यी कम्पनीको बजार पुँजीकरण अमेरिका र चीनबाहेक विश्वका सबै देशको जीडीपीभन्दा ठूलो छ। यी ७ कम्पनीका शेयर नास्डकमा लगभग ५० प्रतिशत योगदान गर्दछ। उत्कृष्ट ७ शेयरमा टेस्ला, मेटा, अल्फाबेट, अमेजन, एप्पल, माइक्रोसफ्ट र एनभिडिया समावेश छन्।
मेटा प्लेटफर्मको शेयरमा भएको वृद्धिका कारण कम्पनीका सीईओ मार्क जुकरबर्गको नेटवर्थमा पनि उल्लेख्य वृद्धि भएको छ। ब्लुमबर्गका अनुसार उनको कुल सम्पत्ति करिब २८ अर्ब डलरले बढेको छ।
फोर्ब्सको रियल–टाइम अर्बपतिहरुको सूचीअनुसार जुकरबर्गको कुल सम्पत्ति १६७.२ अर्ब डलर पुगेको छ र उनी विश्वका धनीव्यक्तिहरुको सूचीमा चौथो स्थानमा पुगेका छन्। –एजेन्सी
