काठमाडौं । सरकारले स्वास्थ्य बीमा कार्यक्रमका लागि साढे ७ अर्ब रुपैयाँ विनियोजन गरेको छ।
आगामी आर्थिक वर्षको बजेटमा स्वास्थ्य बीमा कार्यक्रमका लागि ७ अर्ब ५० करोड रुपैयाँ विनियोजन गरिएको छ। सदनको संयुक्त बैठकमा आज बजेट प्रस्तुत गर्दै अर्थमन्त्री वर्षमान पुनले यसबारेमा जानकारी गराएका हुन्।
स्वास्थ्य बीमा कार्यक्रम विस्तार गरेर स्वास्थ्य सेवामा नागरिकको पहुँच सुनिश्चित गर्ने लक्ष्य सरकारले राखेको छ। ‘स्वास्थ्यसँग सम्बन्धित सामाजिक सुरक्षा कार्यक्रम र स्वास्थ्य बीमा कार्यक्रमको दोहोरोपन हटाइनेछ’, उनले भने।
